Issittumi ilisimatusarfimmi hubimi pisortassamik atorfinitsitsisoqartoq

Anna-Sofie Skjervedal Kalaallit Nunaanni International Arktisk Hubip nutaap allattoqarfiani pisortatut 2020-mi novembarip aallaqqaataani atofinitssaaq.

Issittumi ilisimatusarneq, ilinniartitaaneq nutaaliornerlu pillugit nunani tamalaani suliaqartut assigiinngitsut akimorlugit suleqatigiinnerisa nukittorsarneqarnissaa, taamaalillunilu taakku annertunerusumik Kalaallit Nunaannit aallaaveqarnissaat anuniarlugu Allattoqarfik pilersinneqarpoq.

Namminersorlutik Oqartussat tusagassiorfinnut nalunaaruteqarnermi ilisimatitsipput.

International Arktisk Hub aallaavittut najukkami, nunatsinni aammalu nunani tamalaani ilisimatusartut akornanni attaveqaqatigiinnernik suleqatigiinnernillu pilersitsisassaaq.

- Tamatuma saniatigut International Arktisk Hub-imi ilisimatusarfiit ilinniarfiillu aammalu innuttaasut, suliffeqarfiit, politikkikkut aalajangiisartut soqutigisaqartullu akornanni, inuiaqatigiinni kalaallini nungusaataanngitsumik ineriartortitsinissamut iluaqutaasumik attaveqaqatigiinnermik siuarsaanissaq siunertarineqarpo, lNamminersorlutik Oqartussanit oqaatiginqarpoq.

Issittumi ilisimatusarnermik misilittagalik

Anna-Sofie Skjervedal Nuummi peroriartorsimavoq, aammalu ilinniarnermini nunani allani najugaqarsimalluni. Maannalu novembarip aallaqqaataani pisortatut atorfinitsinneqarluni.

- Anna-Sofie Skjervedalip atorfinitsinneqarnerani International Arktisk Hub allattoqarfimmi pisortamik piginnaaneqarluartumik, issittumi ilisimatusarnermik, suliniutinik aqutsinermik attaveqaqatigiinnermillu misilittagalimmik sulisoqalissaaq. Anna-Sofie Skjervedal 2018-imi Aalborg Universitetimiit aamma Ilisimatusarfimmiit Kalaallit Nunaanni pingaartumik inuusuttut innuttaasutut akuutinneqarnerisa immikkut aallunneqarnera pillugu allaaserisaqarluni Ph.d.-nngorpoq, Namminersorlutik Oqartussanit ilisimatitsissutigineqarpoq.

2017-imili Kommuneqarfik Sermersuumi innuttaasunik akuutitsisarnermi siunnersortinut pisortatut sulisimavoq.