Issittumi filmiliortartut Nikolaj-ip aamma Nukâka-p tapersersorniarpaat

Nunani avannarlerni piginnaasallit pingasut maanna Arctic Indigenous Film Fund-imi 2018-imi pilersinneqartumi ambassadørinngorniarlutik aalajangerput. Issittumi nunaqavissut filmiliortartut piginnaanngorsarneqarnissaat fond-imiit siunnertarineqarpoq.

- Uagutsinnut nuannaarutaavoq tanngassimaarutaallunilu maanna Arctic Indigenous Film Fond tapersersulerneranut, ambassadørinngortut ataatsimoorlutik taama nalunaaruteqarput. Tamanna amerikamiut aviisianiit Variety-miit allaaserineqarpoq.

Issittumi nunaqarfissunut filmiliortartunut tamanna qiimmassaataanissaa isumassarsiorfiusinnaanissaalu aappariit Islandimilu filmiliortartup neriuutigaat.

- Issittumut tamatta inuttut sulinermilu atatillugu annertuumik atassuteqarpugut. Inuit piginnaasallit nalunngilagut tassani aamma nassaarineqarsinnaasut. Nunap inoqqaavisa tusaaneqarnissaat pisariaqarpoq oqaluttuallu pingaarutillit amerlasuut suli nunarsuarmioqatitta tusarsimanngisaat aamma issittumi nassaasaapput, ambassadørit pingasut oqarput.

Nunarsuarmiut malinnaarusupput

Nunap inoqqaavisa filmiliaat annertunerusumik nunarsuarmioqatitsinniit malugineqaleraluttuinnarput. Filmit ilaatigut Saamineersut, Canadameersut, Kalaallit Nunaaneersut, Nunavummeersut Ruslandimeersullu aningaasaateqarfiup tapiiffigineqartarnissaa qulaakkeerpaat.

Maanna AIFF-ip anguniarpaa nunani tamalaani suleqateqarnissaq aningaasaliisoqarnissarlu, Variety allappoq. Arctic Indigenous Film Fund filmit pillugit ataatsimeersuartoqanerani 2018-mi pilersinneqarpoq.

AIFF-ip maannamut suleqatigisani peqatigalugit ukua tapiiffigineqarput: Kelvin Redvers (Canada) Ice Road, Pipaluk K. Jørgensen (Kalaallit Nunaat) This Road of Mine, Marja Bål Nango (Norge) I love my Guodoheaddji, Eduard Novikov (Sakha Republic) At the end of the world, og Nyla Innuksuk (Canada) Slash/Back, aviisi allappoq.