Issittumi Eqqumiitsuliornermik Ataatsimeersuarnermi Nunatsinnit peqataasoqarpoq
Arctic Arts Summit 2022-mi Whitehorsemi Canadami ingerlanneqartumi nunarput sinnerlugu 15-it peqataapput ulluni makkunani.
Kultureqarnermut naalakkersuisoq Peter Olsen (IA) peqataasunut ilaavoq.
- Naalakkersuisut kulturilerisut eqqumiitsuliortullu atugarisaannik pitsanngorsaallutik suliaqarput, taakkumi anersaakkut inuttullu annertuumik nukittorsaaqataasarput. Eqqumiitsuliornerup inuutissarsiutitut isigineqarnissaa Naalakkersuisut sulissutigaat, Arctic Arts Summitimilu tamanna oqallisigissallugu periarfissatsialaavoq, Peter P. Olsen oqarpoq.
Oqaatsit, silap pissusaa, imminut aalajangiinissamut pisinnaatitaaneq aamma kulturikkut kingornussat ilaatigut qulequtaralugit Arctic Arts Summit 2022-mi oqallisigineqarput.
Ukioq manna Arctic Arts Summitimi nunatsinnit peqataasussat ukunaneerput: Katuaq, Nunani Avannarlerni Piorsarsimassutsikkut Attaveqaat (NAPA), Ilisimatusarfik, Kalaallit Nunaata Isiginnaartitsisarfia, Nuummi Eqqumiitsulianik Saqqummersitsivik, Eqqumiitsuliornikkut Pinngorartitsisut Ingerlatsisullu (EPI) aamma nunatsinni eqqumiitsuliortut.
Nunatsinnit peqataasoqarluarnera nuannaarutigaara. Ataatsimeersuarnermi nunat issittumiittut akornanni kulturikkut suleqatigiinnermi ataatsimut soqutigisat unammillernartitallu eqqartornissaannut periarfissaqarluarpoq. Canadap nunattalu eqqumiitsuliornikkut kultureqarnikkullu piviusut tunngavigalugit suleqatigiinnissaannut aallarnisaaffiulluarumaartoq neriuppunga, Peter Olsen oqarpoq.
Arctic Arts Summit ukioq manna pingajussaanik ingerlanneqassaaq, ataatsimeersuarnerlu siulleq Norgemi 2017-imi ingerlanneqarsimavoq.