Issittumi ataatsimiinnermi Anders Samuelsen Danmark Nunarpullu sinnerlugit oqalugiartoq

Issittoq pillugu malunnaatilerujussuit ataatsimiipput, taakku ullumi aqagulu Ruslandip avannaani illoqarfimmi Arkhangelskimi pissapput.

Ruslandip præsidentia Vladimir Putin, Finlandimi Sauli Niinistö aamma Islandimiut Gudni Jóhannesson præsidentit ataatsimiinnermut peqataasussaapput.

Ruslandimit aallartitat vicepremierministerimit Dmitry Rogozinimit siuttuuffigineqarput, Kina aamma inunnik 70-inik vicepremierminister Wang Yangimit siuttuuffigineqartunit aallartitaqarpoq. Tamanna russit nutaarsiassaqartitsiviani TASS-imi paasisutissani atuarneqarsinnaavoq.

Norgep Danmarkillu nunanut allanut tunngasunut ministeritik Børge Brende aamma Anders Samuelsen (LA) Issittumi ataatsimiinnermut aallartippaat.

Atuaruk: Issittormiut ataatsimeersuarneranni silap pissusia sammineqarpoq

Namminersorlutik Oqartussat peqatigalugit ataqatigiissaarneqartoq
Inuussutissarsiornermut, niuernermut nunanut allanullu tunngasunut naalakkersuisup, Vittus Qujaukitsup (S) ICC-p Anchoragemi ataatsimiinnermut peqataanissani salliutimmagut, Anders Samuelsen Naalagaaffeqatigiinneq tamaat sinnerlugu ataatsimiinnermi oqalugiarpoq, tassani 'Issittoq- Nunap ilaa Oqaloqatigiissutigineqartoq' qulequtarineqarpoq.

Issittoq pillugu oqaloqatigiissutigineqarnerata isumaa aamma Anders Samuelsenip ataatsimiinnermi ilanngussaani pingaarnertut sammineqarpoq.

Ilanngussaq Namminersorlutik Oqartussat peqatigalugit ataqatigiissaarneqarpoq, Nunanut Allanut Pisortaqarfik Sermitsiaq.AG-mut ilisimatitsivoq. Nunanut Allanut Pisortaqarfik aamma allatami oqaasertaleeqataasimavoq.

Eqqarsaqqaarani sakkussiortoqannginnissaanut aarlerisaarisoq
Anders Samuelsenip ilanngussami sakkutooqarnikkut sakkussiorneq ukiuni makkunani Issittumi pisoq eqqartorpaa, Kunngeqarfillu Danmark aamma sakkutooqarnikkut nunap tamatuma ilaani annertusaaniartoq.

Kisianni sumiiffimmi tamanna akerleriittoqarnerulinnginnissaa pingaaruteqartoq, nunanut allanut ministeri naqissusiivoq.

- Issittumi naalagaaffiit akornanni siammasissumik isumaqatigiissutit malillugit sakkutooqarnikkut annertusaanerit tamarmik pisarnissaat pingaaruteqarpoq, taanna oqalugiarnermini oqarpoq.

- Allatut oqaatigalugu: ajornartorsiutit eqqissisimasumik aamma nunani tamalaani inatsisit iluini aaqqinneqartariaqarput.

- Naalagaaffiit tamarmik iliuutsit akerleriissutittut imaluunniit aporaannertut paasineqarsinnaasut pinngitsoorniartariaqarpaat.

Qalasersuaq
Taanna aamma Ilulissanit nalunaarummut 2008-meersumut unnersuussivoq, tassani Issittumi sineriallit naalagaaffiit akerleriissutaasut eqqissisimasumik iluarsineqartarnissaannut isumaqatigiissuteqartoqartoq.

Qalasersuarmut piginnittuunermut Ruslandip illuanilu Kalaallit Nunaat/Danmarkilu oqallittoqarnerani akerleriissutaasut taakku ilagaat.

Namminersorlutik Oqartussat ataatsimiinnermi atorfilittanik aallartitaqarput.

Nunanut allanut ministerip ilanngussaa tamaat tuluttut uani atuarneqarsinnaavoq.