Issittumi aningaasaateqarfik inuusuttut pillugit suliniutinut tapiissuteqarniartoq

Arctic Indigenous Fund Issittumi inuusuttut pillugit suliniutinut aningaasatigut tapiissuteqarnissamut piareeqqavoq, Kalaallillu Nunaanni inuusuttut qinnuteqaqqullugit kaammattorneqarlutik.

Arctic Indigenous Fund (AIF) aningaasaateqarfiuvoq nutaaq ajunngitsuliorumasoq. Aningaasaateqarfik inuusuttunit nunat inoqqaavineersunik Issittumilu najugaqartunit aqunneqarpoq. Taakkut namminneq aalajangertarpaat, najugarisaminni kikkut tapiiffigineqassanersut.

Kalaallit Nunaannit siunnersortaapput Kuluk Lyberth aamma Tukummingiaq N. Olsen, aamma Alaskamit, Sverigemit, Finlandimit Canadamiillut siunnersorteqarpoq.

- Inuusuttunik sullissisut imalluunnii inuusuttunik sullisserusuttut tapersersorniarlugit sulivugut, AIF-imi siunnersorti Kuluk Lybertht tusagassiorfinnut nalunaaruteqarnermi oqarpoq.

Nunat inoqqaavi qitiutinneqassasut

- Arctic Indigenous Fundimit anguniagaavoq, nunat inoqqaavisa Issittumi ajunngitsumik atugaqarnissaat. Anguniagaq tapersersorniarlugu, kulturimut ataqqinnilluarpugut aamma inuit namminneq atugassarititatik naapertorlugit aalajangiisinnaanerannut akuersaarpugut, tusagassiorfinnut nalunaauteqarnermi oqaatigineqarpoq, nangillugulu oqaatigineqarluni:

- Immitsinnut suleqatitsinnullu ataqqinnikkusullutalu inussiarnisaarusuppugut. Eqaatsumik peqataatitsisumillu akisussaaffipput isumaginiarparput; aamma inuiaqatigiittut nukittuujunitsinnut tapiissuteqarnermut peqatigitillugu maniguuttuunerput, qiimasuunerput tunisiumatunerpullu attatiinnarniarparput.

Tuummingiaq N. Olsen oqarpoq:

- Immaqa amerlasuut allatut eqqarsarnertut isigisinnaavaat, kulturitoqqatsinnilli tigusineruinnarpoq. Siulivut pisaqarluarsimagaangamik nunaqarfimmiut tamaasa avitseqatigisarpaat, taamatullu anersaaqarluta ikiuukkusuppugut.

Piffissaliussaq

Aningaasaateqarfimmut qinnuteqaatit kingusinnerpaamik aggustusip 26-ani tunniunneqareersimassapput, aamma nittartagaq https://www.arcticindigenousfund.com/ aqqutigalugu paasissutissanik amerlanerusunik pissarsisoqarsinnaavoq.

Powered by Labrador CMS