Issittumi Siunnersuisoqatigiit
Issittormiut ataatsimeersuarneranni silap pissusia sammineqarpoq
Issittumi Siunnersuisoqatigiinnut ilaasortat isumaqatigiissutigaat silap pissusiata allanngoriartornera annertunerusumik akiorniarlugu.
Ruslandip Ukraine-mi pissusilersornera ippinnaqutaasinnaavoq, Danmarki Issittumilu Siunnersuisoqatigiinni ilaasortat allat arfineq-marluk tallimanngormat Iqalunni ataatsimiimmata.
Nunalli Ukraine-p kangiani aaqqiagiinngissuteqarnermit sunnertinnaveersaarput, taarsiullugulu ilaatigut oqaluuseralugu silap pissusiata allanngoriartornerata issittumut qanoq sunniuteqarnera.
Danmark, Canada, Finland, Island, Norge, Rusland, Sverige USA-lu neriorsoqatigiipput silap pissusiata allanngoriartornera annertunerusumik akiorniarlugu. Isumaqatigiissulli inatsisitigut qilersorsimasuunngilaq.
Ataatsimiinnermi Issittumi Siunnersuisoqatigiinni siulittaasuuffiup USA-mut tunniunneqarnera malunnartinneqarpoq, ataatsimeersuarnermilu Danmarkip pisortatigoortumik aallartitaata, nunanut allanut ministerip Martin Lidegaardip (R), iluarsimaarluarpaa amerikarmiut silap pissusia sammitinniarsimammassuk.
– Issittumi Siunnersuisoqatigiit tamavimmik tamakkiisumik taperserpaat tamanna qaammatini aggersuni pingaarnerpaatut sammineqassasoq, Paris-imi COP21-ip (FN-ip silap pissusia pillugu ataatsimeersarnissaa, aaqqiss.) ingerlanneqarnissaata tungaanut, aammalu issittumi nunat tamatuma qanoq erloqinartigineranik nunarsuarmut oqaluttuusseqataassasut, aammattaarli takutissagipput silap pissusiata allanngoriartornera qanoq isilluni akiorneqarsinnaanersoq, Martin Lidegaard Ritzau-mut oqarpoq.
Issittup imartaata ukiukkut sikuata annertussusia 1979-imi uuttortarneqartalermalli ullumikkut aatsaat taama millisimatigaaq, Reuters amerikarmiunit paasissutissat tunuliaqutaralugit allappoq.
Tamaani sila nunarsuarmi sumiiffinniut allanut sanilliullugu marloriaammik sukkatigisumik kissatsikkiartorpoq, taamaattumillu Martin Lidegaardip tamanna ´nunarsuup ineriartorneranut silasiutitut´ taaneqarsinnaasoq.
Sikup aakkiartornera pissutigalugu umiarsuit aqqutaat uuliaqarfiillu nutaat pilersinnaapput, aammattaarli inuiaqatigiit arlallit, pinngortitamik inuussutillit, assersuutigalugu Kalaallit Nunaanni, ulorianartorsiortinneqassallutik.