Issittoq: USA-p Kinamut isornartorsiuini sakkortusivaa

Amerikamiut nunanut allanut tunngasunut ministeriat, Mike Pompeo, sisamanngornermi Kim Kielsen aamma nunanut allanut tunngasunut naalakkersuisut marluk Ane Lone Bagger aamma Anders Samuelsen Nuummut ataatsimeeqatigiartorlugit tikittussaq, Kinamut aamma Ruslandimut tunngasunik isornartorsiungaatsiarluni Issittumi Siunnersuisoqatigiit naalakkersuisunik Finlandimi ullumi aallartinneqartumi ataatsimiisitsineranni oqalugiaateqarpoq.

Pissaaneqarfiusoq

- Issittup nunataa pissaaneqarfinngorlunilu unammilleqatigiiffiulernikuuvoq. Issittumilu naalagaaffiit arfineq-pingasut siunissamut nutaamut tulluussassapput, Mike Pompeo oqarpoq, manna tikillugu ilisimatusarnikkut aamma kulturikkut suleqatigiittoqarsimanera aamma oqaatigaa.

- Sulineq tamanna ingerlatiinnassavarput, kisianni piffinnut nutaanut pivugut, Issittumullu ulorianartorsiortitsineq nutaaq pilerpoq, amerikamiut nunanut allanut tunngasunut ministeriat oqarpoq, Issittumilu pisuussutit uulia, gassi, aatsitassat aamma aatsitassat qaqutigoortut annertuut nassaassaasut oqaatigalugu.

Malittarisassat assigiit

- Issittoq atorluarniarlugu naalagaaffiit tamarmik, tassani nuna issittumiinngitsut ilanngullugit, toqqissisimasumik nunap immikkoortuani tamaani suliaqarsinnaatitaassapput. Niuerfiit killilersugaanngitsut USA-p upperai. Unammilleqatigiinneq killilersugaanngitsoq aamma tulluartoq, naalagaaffimmik naalagaaffik inatsisit tunngavigalugit naalakkersugaasumi pitsaanerpaamik angusaqarfiusartoq misilittakkatsinnik ilisimavarput.

- Kisianni niuernermi peqataasut tamarmik malittarisassat assigiit malittariaqarpaat. Malittarisassanik taakkuninnga unioqqutitsisut, niuerfimmi tassani peqataanissamut pisinnaatitaaffitsik annaassavaat. Ataqqinninneq aamma ammasuuneq peqataanissamut akiuvoq. Taamatut aallarniuteqarnerup kingorna Mike Pompeo Kinamut saappoq.

- Kina Issittumik Siunnersuisoqatigiinni aalajangeeqataasinnaanani peqataasinnaatitaavoq, kisianni taamatut pisinnaatitaaneq issittumi naalagaaffiit pisinnaatitaaffiinut ataqqinninnermik pisussaaffeqarpoq. Pisussaaffik taanna Kinap naammassissagaa, USA-p kissaatigaa, nunallu immikkoortuanik akisussaassuseqartumik tapeeqataanissaa. Kisianni Kinap oqariartuutai aamma iliuusai siunertaanik nalornilersitsipput, Mike Pompeo oqarpoq, imalu itisiliilluni:

Kina 900 milesinik Issittumit ungasissuseqartoq

- Beijing ” Near-Arctic State”-tut, tassani naalagaaffik Issittumut qanittutut imminut oqaatigisarpoq, kisianni Kinap aamma Issittup akornanni isorartussutsit qaninnersaat 900 milesinik ungasissuseqarpoq. Issittumi naalagaaffeqarlunilu aamma issittumi naalagaaffiunngitsunik taamaallaat peqarpoq. Pingajuattut taaguuteqartoqanngilaq, Pompeo oqarpoq, taassuma kinamiut ammasumik aningaasaliisarnissaat kissaatigaa.

- Issittup imartaa kinamiunut sakkutooqarfiusunngorlugu aamma nunap killinginik unammiffinngorlugu imartanngortinnissaa kissaatigaarput? Issittup avatangiisai ajortiasut Kinap imartani aalisarnermi umiarsuaataanik nammineq nunaminni nakkutigineqanngitsumik suliffeqarfissuit suliaqarnerisa assinganik aserorterneqarnissaa kissaatigaarput? Akissutit ersarilluinnartut isumaqarpunga, Kinap ilisimatusarneq aqqutigalugu Issittumi sakkutooqarnikkut peqataanerminik annertusaaniarneranut mianersoqqusisoq, Mike Pompeo oqarpoq.

Russit ernumagineqarnerat

Ruslandip issittumi suliaqarneranut ernumassutit pillugit Mike Pompeo ilaatigut ima oqarpoq:

- Nordsømi aqqutit nunat tamalaat imartaanni Ruslandip piumasaqarnera ernumassuteqarfigaarput, Kinap imaatigut aqqutaannut atalernissamut pilersaarutit qanittukkut nalunaarutigineqartut ilanngullugit. Nordsøp aqqutaani Moskvap unioqqutsilluni piumasarilereerpaa, naalagaaffiit allat aqqutigissagunikku qinnuteqaqqaartarnissaat, russit oqartussaat umiarsuarnut nunanit allaneersunut ilaasarnissaat aamma piumasaqaatinik malinninngitsut sakkutuulersorfigalugit kivisinneqartarnissaannik sioorasaaralutik, amerikamiut nunanut allanut tunngasunut ministeriat oqarpoq.

Russit sakkortusaarnerat

- Taakku iliuutsit peqqusaartut russit maani sakkortusaartumik ileqqoqarnerannut ilaapput. Ruslandip issittumi sakkutooqarfik umiarsuarnik sorsuutilerlugu ammaqqikkamiuk, nunap immikkoortuani sakkutooqarnerulernissamik siunertaqarnini 2014-imi nalunaarutigaa, Mike Pompeo oqarpoq, Ruslandillu Issittumi sakkutooqarnerulernera pillugu ersarinnerusumik oqaaseqarpoq.

- Issittoq inoqannginnersaariarmat inatsisaatsuunissamut ammaassineranik isumaqanngilaq. Taamaalinnginnissaanut qulakkeerinninnissamut piareersimavugut, Mike Pompeo oqarpoq.

Suliniutit aalajangersimasut

Mike Pompeop Nuuk tikeraalerpagu, oqalugiaammi tassani pingaartinneqartut Nuummi qaqinneqarnissaat qularnanngilaq, tassani nunanut allanut tunngasunut ministereqatini naapissavai. Amerikamiut suliniutissaannik Kalaallit Nunaannut aamma Danmarkimut tunngasunik aalajangersimasunik saqqummiussiuaarnersoq apeqquterujussuuvoq, tamannalu sisamanngorpat aatsaat saqqummiunneqassaaq.

USA-p nunanut alanut tunngasunut ministeriaqarfiata nittartagaani oqalugiaat tamaat atuaruk