Skip to main content

Issittoq pillugu periusissiamut tunngatillugu isornartorsiuineq Jeppe Kofodip akerlilerpaa

Kunngeqarfimmi issittoq pillugu periusissiap suliarineqarnera ingerlalluarmat, savalimmiut kalaallillu politikerii suliami peqataatinneqangajalerput. Nunanut allanut tunngasunut ministeri Jeppe Kofod (Soc) taama oqarpoq.

Issittoq pillugu periusissiap suliarineqarnera pilersaarutit malillugit ingerlavoq. Danmarkip, Savalimmiut Kalaallit Nunaatalu paaseqatigiinneratigut aamma suliarineqassaaq. Nunanut allanut tunngasunut ministeri Jeppe Kofod (Soc)  Det Færøske Nyhedsbureauimut taama ilisimatitsivoq.
 
Nalunaarusiaq pillugu Folketingimi oktoberip qulingiluaani oqallittoqareernerani, folketingimut ilaasortat Martin Lidegaard (R) aamma Aaja Chemnitz Larsen (IA) nunanut allanut tunngasunut ministeriaqarfimmut isornartorsiuipput. Taakku isumaqarput issittoq pillugu periusissiamik suliaqarnermi politikerit amerlanerusut peqataatinneqartariaqartut, suliap naammassinnginnerani.
 
Isornartorsiuineq nunanut allanut tunngasunut ministerip Jeppe Kofodip maanna akerlilerpaa.
 
- Isornartorsiuineq uniorujussuarpoq. Ilumut. Issittoq pillugu periusissiaq maanna atuuttoq 2020-ip naanerani atorunnaassaaq. Issittoq pillugu periusissiatullu suliaq pilersaarutit malillugit, naalagaaffeqatigiinnerullu iluani paaseqatigiinneq malillugu, ingerlavoq, Jeppe Kofod oqarpoq.

Politikerit aappaguumit peqataatinneqalissapput

2021-nngornissaanut piffissaq sivikilliartuinnarpoq, tamannalu pillugu folketingimi ilaasortat pilersaarutip malinneqanngitsoornissaa ernummatigilerpaat. Suliamimi atorfilittat kisimik suliaqartuugallarput, savalimmiormiullu kalaallillu politikerii suli peqataatinneqaleratik. Aaja Chemnitz Larsen oqarpoq sammisat imarisassaatalu suusinnaaneri pillugit Kalaallit Nunaanni suli aalajangertoqanngitsoq, taakkulu suliarineqartariaqalersut 2020-p naanissaa ungasigunnaareermat.
 
Periusissiap nutaap soqutigineqarluarnera Jeppe Kofodip nuannaarutigaa, isornartorsiuinerli paasisinnaanagu.
 
- Suliaq ima ingerlalluartigaaq politikerit peqataatinneqalernissaat allaat nallerluinnalerluni. Naalagaaffeqatigiit iluani nunat suleqatigilluinnarlugit peqataatitsilernissaq ukiup nutaamit aallartinnissaa naatsorsuutigaarput. Taamaammat isornartorsiuineq inissaminiissorinngilara, Jeppe Kofod oqarpoq.
 
Savalimmiormiulli kalaallillu politikerii ulloq suna peqataatinneqalissanersut pillugu oqaaseqarsinnaanngilaq.

 - Naalagaaffeqatigiit iluani nunat pingasuusugut akornitsinni tamanna isumaqatigiissutigissavarput. Oqareernittut politikerit, soqutigisaqartut, ilisimatuut inuussutissarsiornerullu iluani suliaqartut ukioq nutaamiit annertuumik peqataatinneqassapput, tamassumunngalu qilanaarpunga. Uanga danskillu naalakkersuisuisa naalagaaffeqatigiinneq nukittooq naligiinnermit, tatigeqatigiinnermik ataqqeqatigiinnermillu tunngaveqartoq pingaartilluinnarparput, Jeppe Kofod erseqqissaavoq.

Pilersaarut malillugu ingerlavoq

Jeppe Kofod naapertorlugu nutaamik periusissiortoqarnissaanut suli piffissaqarluarpoq.

- Mianersoqqussutigisariaqarparali pilersaarutit malinnagit ingerlaneraasoqarneratigut imaluunniit suliami peqataatitsinngitsutut isiginiarneqassagutta, suliallu nalinginnaasumik taamaasilluni innarlerneqarneratigut, politikkikkut sulineq aamma unitsinneqartoorsinnaammat.

- Taamaammat erseqqilluinnartumik oqaatigisariaqarpara suliami sumilluunniit suli aalajangertoqanngimmat. Tamanna tikitsinnagu politikkikkut suliaqartut soqutigisaqartullu peqataatinneqaqqaartussaapput, Jeppe Kofod erseqqissaavoq.

Kalaallit Nunaat Savalimmiullu pingaaruteqartut

Jeppe Kofod ilisimatitsivoq Reykjavikkimi sapaatip akunnerani kingullermi Arctic Circlertoqarnerani, suliamut tunngatillugu naalakkersuisut siulittaasuat Kim Kielsen, nunanut allanut tunngasunut naalakkersuisoq Ane Lone Bagger aamma Savalimmiuni nunanut allanut tunngasunut politikkimi naalakkersuisuni ilaasortaq Jenis av Rana, peqatigalugit oqaloqatigiinnerit siulliit aallartissimallugit.
 
Nunanut allanut tunngasunut ministerip erseqqissarpaa issittoq pillugu periusissiap suliarineqarnerani Kalaallit Nunaat Savalimmiullu qanimut suleqatigineqassasut.
 
- Kalalalit Nunaat Savalimmiullu peqataatinnagit issittoq pillugu periusissaq soorunami pitsaasumik suliarisinnaanngilarput. Taamaattumik uannut pingaaruteqarluinnarpoq suleqatigiinnikkut, kalaallillu savalimmiormiullu pingaartitaat takorluugaallu peqataatilluinnarlugit, suliap naammassineqarnissaa. Naalagaaffeqatigiit akornanni politikkikkut suleqatikka taama aamma ilisimatippakka, tamannalu attappara, Jeppe Kofod oqarpoq.

Nunanut allanut tunngasunut ministeri Kalaallit Nunaannut oktoberip 21-ani tikeraassaaq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER