Issittoq pillugu nunat tamalaat ataatsimiinnissaat taamaatiinnarneqartoq

Arctic Circle Assembly, nunat tamalaat attaveqaqatigiittarfiat, Issittoq oqaluuseriniarlugu oktobarip qaammataani Reykjavikimi ataatsimiinnissaraluat taamaatinnarneqarpoq.

Covid-19-ip nunarsuarmi tuniluunnera pissutigalugu, Arctic Circle Assemblyp 2021-mi oktobarip 14-iani pisussanngorlugu kinguartinneqarnissaa aalajangiunneqarsimavoq.

Siorna ataatsimiittoqarnerani Kalaallit Nunaanni pissutsit soqutigineqarluarnerat kalaallit oqalugiartut arlallit misigisimavaat, tassa Amerikami præsidentip Donald Trumpip Kalaallit Nunaannik pisiaqarnissamik soqutiginnilluni nalunaaruteqareernerata kingorna.

Kielsen ammaanermi oqalugiartunut ilaasimasoq

Siorna Naalakkersuisut Siulittaasuat Kim Kielsen ammaanermi oqalugiartunut ilaavoq, naalagaaffiit pissaanilissuit, soorlu USA-p, Kinap Ruslandillu issittumut tunngatillugu ukkataqarnerulerneranni Kalaallit Nunaata issittumi qitiusututu inissisimanera tamatumuunakkut erseqqissaaffigineqarpoq.

Arctic Circle Assemblymut politikkerit peqataanerisa saniatigut pisortani kommuninilu atorfilittat peqataasarput, soorlu aamma Kalaallit Nunaanni suliniaqatigiiffissuit suliffissuillu peqataatitaqartartut.

Arctic Circlep Reykjavikimi allattoqarfiani pisortap Ásdís Ólafsdóttirip Sermitsiaq.AG-mut ilisimatitsissutigaa, Namminersorlutik Oqartussat suleqatigalugit Kalaallit Nunaanni nunat tamalaat ataatsimeersuarnissaannik pilersaarut aamma kinguartinneqarsimasoq.

-Kalaallit Nunaanni ataatsimeersuarnissamut tunngatillugu qaammatip tulliani ulluliisoqarnissaa naatsorsuutigaarput, Ásdís Ólafsdóttir ilisimatitsivoq.

Powered by Labrador CMS