Issittoq pillugu Ilulissani ataatsimeersuartoqarniartoq
Naalagaaffeqatigiinni pingasuusuni inatsisartuni ilaasortat Kunngeqarfiup issittumut tunngatillugu periusissiassaa oqaluuseriniarlugu Ilulissani ataatsimeeqatigiissapput
Kunngeqarfiup issittumut tunngatillugu periusissiaa ukioq manna atorunnaassaaq, taamaammallu nutaamik sanasoqassalluni.
Periusissiaq 2011-mili atuussimavoq, taamanerniillu nunat tamat Issittumut soqutiginninnerulersimapput. Soqutiginninnerulerneq Donald Trumpip Kalaallit Nunaannik pisiaqarusunneranit erseqqissumik takutinneqartoq.
Periusissiamik nutaamik ullutsinnullu naleqqunnerusumik suliaqarnissaq Ilulissani martsip qaammataata naanerani ataatsimmiinnermi aallartinneqassaaq.
- Kunngeqarfiup issittumut tunngatillugu nutaamik periusissiornissaa, sapinngisamillu amerlanerpaanik peqataatitsisoqarnissaanik kissaateqartoqarsimanera tunngavigalugit inatsisartuni ilaasortat ataatsimeersuartinneqarnissaat aaqqissuunneqarsimavoq. Tassunga atatillugu Kalaallit Nunaanni, Danmarkimi Savalimmiunilu ataatsimiititaliat suliassamut attuumassuteqartut inatsisartullu Ilulissani martsip qaammataata 27-aniit 29-anut ataatsimeersuarnissamut aggersarneqarsimapput, nunanut allanut naalakkersuisoqarfik Sermitsiaq.AG-mut nalunaaruteqarpoq.
- Siunertaavoq inatsisartuni ilaasortat issittumut tunngatillugu periusissiassamut nutaamut ilanngussassaqarpata ilanngussisinnaanissaat politikkikkullu tapiissuteqarsinnaanissaat.
- Inatsisartut ataatsimeersuarnerisa saniatigut inussutissarsiortunit soqutiginnittut, ilisimatusartut, NGO-t kommunillu oqaloqatigalugit ataatsimeeqatigineqaqattaassapput innuttaasullu ataatsimiitsinneqarlutik.
Aamma issittumut tunngatillugu periusissiassaq kingusinnerusukkut Christiansborgimut tusarniaassutigineqassaaq.