Skip to main content

Issittoq nunarsuarmut akisussaaffeqarpoq

Silap pissusiata allanngoriartornera peeruttussaanani takkussimavoq. Tamanna ilisimatuut amerlanerpaartaasa isumaqatigaat. Kisiannili...

Silap pissusiata allanngoriartornera peeruttussaanani takkussimavoq. Tamanna ilisimatuut amerlanerpaartaasa isumaqatigaat. Ilisimatuulli paasisaasa ilisimasaasalu saqqummiunneqartarnerat naammanngilaq inuit pissusilersornerisa allanngortinnissaanut.
Professor Københavns Universitetimilu Geologisk Institutimi pisortaq Minik Rosing, Islandip illoqarfiisa pingaarnersaanni Reykjavikimi Arctic Circle Forum-imi peqataasoq, nammineq tassunga iseriarfeqarpoq. Taanna ilisimatuutut ullut naggatissaannik oqariartuuteqarnianngilaq, tamannali peqatigalugu ajornartorsiutit erloqinartutut isigai.
– 1904-mili qallunaaq fysiologi Kalaallit Nunaanni Arktisk Stationimi paasisaqarpoq, ukiullu marluk qaangiuttut Meddelelser om Grønland-imi allaaserinnippoq kiassarnermut suliffissuaqarnermilu aamarsuarnik ikuallaanermut atatillugu kuldioxid-ip imaani silaannarmilu agguarsimaneranik, Minik Rosing nassuiaavoq.
Kingorna Nobelip fysik-imi nersornaasiuttagaanik nersornaaserneqartup paasisai svenskip ilisimatuup Svante Arrhenius-ip taperserpai, taassuma gas-it kissatsinnartut paasimmagit. Taassuma 1906-imi paasivaa suliffissuaqarfinni aamarsuarnik atuileraluttuinnarnikkut silap pissusia allanngortinneqartoq, kissatsikkaluttuinnarluni.
– Kingorna ilisimatuut oqaatigisarsimavaat tamanna arajutsisaanneqartariaqartoq, mannali tikillugu qanoq pisoqarsimanngilaq pissutsit ajorsigaluttuinnarsimagaluartut. Oqartariaqarpugut ilisimasat naammanngitsut. Inuit pissusilersornerat allanngortinneqanngilaq. Ineriartorneq tamanna unitsinniarlugu sakkortunerusumik iliuuseqartoqartariaqarpoq, Minik Rosing oqarpoq.
Taamatut oqareerluni professor Minik Rosing qiimmaallannartumik nalunaajaateqarpoq. Taanna isumaqarpoq silap pissusiata allanngoriartornera periarfissanik arlalinnik ammaasoq, Issittup killeqarfia qaangerujussuarlugu.
– Issittumi najugaqartugut aappaatigut nutaarsiassanik ajortuinnarnik pilersuissanngilagut. Imatut inissisimavugut, ullumikkut nunarsuarmi nerisassat ilarparujussuinik pilersuisinnaalluta. Nunarsuarmi puullaaqileraluttuinnartumi, silap pissusiata allanngoriartornera ersigineqartorujussuarmi, nunarsuarmut tamarmut akisussaassuseqartariaqarpugut, Minik Rosing oqarpoq.
Taanna ajornartorsiummut imaasiallaannaq aaqqiissutissaqanngilaq, tamannali peqatigalugu isumaqarpoq oqaasiinnartigut ersisaarineq iluaqutaanngitsoq. Inuit pissusilersornerat allanngortinneqassappat silap pissusiata allanngoriartornerata kinguneqaatai namminneq timimikkut misigisariaqarpaat.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER