Issittoq eqqissisimaffiusoq qanoq ililluni qulakkeerneqarsinnaava?
Sapaatip akunnerani tullermi Katuami inuit ataatsimiinneranni Issittumi isumannaatsuuneq oqaluuserineqassaaq. Ukrainemi maanna pisut siunissami isumannaatsuunermut politikkimut apeqqutinik nalorninartorsiortitsilerput.
Issittup sakkutooqarnikkut pissanganartorfiunnginnerata attatiinnarnissaanik upperinninneq neriuuteqarnerlu attatiinnarneqarsinnaava?
Apeqqut tamanna sapaatip akunnerani tullermi oqaluuserineqassaaq, tassungalu inuit soqutiginnittut Katuami qulequtserlugu ”Maanna siunissamilu Issittumi Isumannaatsuuneq pillugu inuit ataatsimiinnerat”-nut qaaqquneqarput. Aaqqissuussisuuvoq pilersinneqaqqammersoq Nasiffik – pilersinneqartoq Ilisimatusarfimmi Nunanut Allanut Tunngasunut Isumannaatsuunermullu Politikkimut Centerimit aamma CAS-imit (Forsvarsakademimi Center for Arktiske Studier).
Aviisi AG allappoq.
Innuttaasunik ataatsimiititsinermi tunuliaqutaavoq innuttaasut aalajangiisartunut, illersornissamit isumaqatigiissutissamik piareersaaleruttortunut, isummaminnik saqqummiussitinnissaat.
- Ilikkagaqarusukkaanni imaluunniit annikkusutaqaraanni taamaasiornissamut innuttaasunik ataatsimiititsineq periarfissaavoq, Jeppe Strandsberg aperineqarami sooq ataatsimiinnermut orniguttariaqarnersoq, akivoq.
Taanna Ilisimatusarfimmi Inuiaqatigiilerinermut, Aningaasaqarnermut Tusagassiornermullu Instituttimi, kiisalu Center for Arktiske Sikkerhedsstudierimi lektoriuvoq, inuillu ataatsimiinneranni panel-imi peqataassaaq. Panelimi peqataasussat allat tassaapput ph.d.-ngorniartoq Sara Olsvig kiisalu Camilla Sørensen, Peter Viggo Jakobsen aamma Jørgen Staun, tamarmik Forsvarsakademimeersut. Tamarmillu Ruslandip Ukraine saassummaguli qallunaat tusagassiorfiini immikkut ilisimasalittut oqaaseqartartutut atorneqakulasimapput.
Allaaserisaq tamaat uani AG-mi pisiarisinnaasanni atuaruk: