Isornartorsiuisut: Tusarniaassutigineqartoq isorineqaqisoq unitsikkallarli
Illuatungiliuttuni partiip IA-p peqatigiiffiullu Uraani Naamik Naalakkersuisunut piumasaraat, Kuannersuit pillugit tusarniaaneq unitsikkallarneqassasoq.Taakkut suliniutip piviusunngortinneqarneratigut peqqissutsimut avatangiisinullu kingunerluuteqarsinnaanera ernummatigaat.
Uranimut akerliusartut Inuit Ataqatigiit piumasaraat, naalakkersuisooqatigiit Siumut, Demokraatit Nunattalu Qitornaasa Kuannersuarni aatsitassarsiornissaq pillugu tusarniaaneq unitsikkassagaat.
- Tusarniaanermi atortussat tusarniaassutigineqalerneranni naammasseriigaasarput, tassunga ilaalluni innuttaasut ataatsimeeqatigineqarnerat. Aamma ima isumaqartussaavoq apeqqutit suli nalorninaatillit, soorlu eqqagassat qanoq passunniarneqarnerat inissereerneqartussaalluni, paasissutissallu inisseriigaassaallutik, Inatsisartut Inuussutissarsiornermut Aatsitassanullu Ataatsimiititaliaanni siulittaasup tullia Sofia Geisler (IA) tusagassiorfinnut nalunaaruteqarnermi allappoq.
Taanna Urani Naamimmi siulersuisunit taperserneqarpoq.
- Siullertut Greenland Minerals A/S-ip VVM pillugu nassuiaataata aamma VSB pillugu nassuiaataata juullernissaanut sapaatip akunnerinnanngortoq tamanut tusarniaassutigineqarlutik aallartinneqarmata innuttaasut ataqqineqanngillat, taakku tusagassiorfinnut nalunaaruteqarnerminni erseqqissaatigaat.
Paasissutissat pingaarutillit amigaataasut
Sofia Geislerip oqaatigaa suliniut tusarniaassutigineqarnissamut piareersimanngitsoq.
- Ullormanna tikillugu Narsarmiut tamatumalu eqqaani najugallit tamakkiisumik ilisimatinneqanngillat Kuannersuarni aatsitassarsiortoqalissappat tamatuma peqqissutsimut avatangiisinullu sunniutigisinnaasai pillugit. Tamanna Inuit Ataqatigiinniit ernumassutigivarput, Sofia Geisler oqarpoq.
Suliniummut tapersersuisut suliffissanik pilersitsisoqarnissaanut nunallu immikkoortortaata ineriartortinneqarnissaanut kiisalu suliniutip aallartinneqarnerani akileraarutitigut isertitaqartoqarnissaanut tunngatillugit isumalluarput. Tusarniaanerup aallartinnerani Namminersorlutik Oqartussanit erseqqissaatigineqarpoq, VVm aamma VSB pillugit nalunaarutit akuerineqarsimanngitsut, tusarniaassutigalugilli aallartittoqaannarsimasoq. Innuttaasut tusaaneqarnissaminnut maanna periarfissaqalersut Naalakkersuisunit erseqqissaatigineqarpoq.
Inuit Ataqatigiinnit aamma innuttaasut apeqqutigisaminnut akissutissarsisinnaanersut ernummatigineqarpoq. Partii isumaqarpoq, aatsitassarsiornerup avatangiisinut kingunerisinnaasai pillugit paasisitsiniaanerni peqataatinneqartut ilisimatuut Narsarmiut eqqaanilu najugallit innuttaasut ernumallutik apeqqutaannut amerlasuunut akisinnaasarsimanngitsut.
Mingutsitsinnginnerusumik aaqqiissuteqartoqarnissaa ujartorneqartoq
- Inuit Ataqatigiinniit aammaarluta Naalakkersuisoqatigiinnut kaammattuutigissavarput aatsitassarsiorniarnerup avatangiisinut inuiaqatigiinnullu kingunerisinnaasai suli nalorninartoqartillugit tusarniaaneq unitsikkallaqqullugu. Kujataani inerisaaneq avatangiisinik eriaginnittoq ukkatarineqarli. Uranimik piiaanissamik pilersaarutit illikartillugit inuussutissarsiutit pioreersut ineriartortinneqarsinnaasullu amerlaqisut ukkatarineqarlik, taanna oqarpoq.
- Tamatta akisussaaffigivarput Nunarput qitornatsinnut ernutatsinnullu tunniutassarput tassaassammat peqqissoq, naapertuilluartoq, nammaqatigiiffiusoq ammasuusorlu. Tassaassanngilaq Nunatta Karsiata imakisaarfiunerani akiliiumanerpaamut tuniniagassarput, ullumikkutullu ilillugu utertinneqarsinnaajunnaarsitassarput. Narsarmi, Kujataani Nunatsinnilu tamarmi, Sofia Geisler oqarpoq.