Isornartorsiuisut arfineq-marluk Kim Kielsen suli tatiginngilaat
Inatsisartuni ilaasortat arfiniliusut aamma aatsitassanut suliffeqarnermullu naalakkersuisoq, Erik Jensen, partiimi siulittaasuminnut Kim Kielsenimut suli tatiginninngillat. Oqaaseqartartuat Anders Olsen Sermitsiaq.AG-mut taama oqarpoq.
OBS. Allaaserisaq nal. 14:50 aaqqinneqarpoq, aatsitassanut suliffeqarnermullu naalakkersuisup, Erik Jensenip (S) akissutaa ilanngunneqarluni.
Kim Kielsen ullormi ataatsimi ulapingaatsiareerluni partiip siulittaasuatut ingerlaqqissinnaanngorpoq. Siulersuisuunerit suli tatigilluinnarpaat. Tamannali isumaqanngilaq Siumumi ilaasortat tamarmiusut tapersersoraat.
- Tassunga tunngatillugu isumaqarput suli attapparput. Suli tatiginngilarput (aaqq. Kim Kielsen) partiitsinni siulittaasuunissaa, Anders Olsen (S) ilaasortat arfineq-marluk isornartorsiuisut sinnerlugit oqaaseqartartoq oqarpoq.
Taassumalli oqaatigisinnaanngilaa Inatsisartut ukiamut ataatsimiinnerisa nalaanni Kim Kielsen pillugu tatiginnikkunnaarnermik taasisitsisoqaraluarpat qanoq taasissanerlutik.
Partiimi ilaasortat nuimanerit arfineq-marluusut sapaatip akunnerata aallartilaarnerani allakkiamik tusagassiutinullu nalunaarummik nassiussaqarput. Nalunaarutigalugulu partiimi siulittaasortik tatigiunnaarlugu.
Tunngavilersuutigineqartut ilagaat siulittaasup qinersisartunut neriorsuutigisani eqquutsissimanngikkai, suleqatikkuminaammat, siorasaarisarmat matorluttaarisarlunilu.
Taakku piumasaat, siulittaasoq Siumumi siulittaasutut piaartumik tunuassasoq.
Sammisat arlallit oqaluuserineqarput
Siumumi ippassaq ataatsimiinnerni sammisat mianernarsinnaasut arlallit oqaluuserineqarput.
Aammali iluminni illuatungeriit suleqatigiissutigisinnaasaat oqaluuserineqarput. Anders Olsenip itisilinngilai suleqatigiissutigineqarsinnaasut suut oqaluuserineqarsimanersut.
Siumumi siulittaasuuffik aamma tikinneqarpoq, Kim Kielsenimi tusagassiortunut aggersimasunut ilisimatitsivoq ataatsimeersuarnermi tullermi siulittaasutut sassaqqissanani.
- Aalajangernera tusarparput, aamma tamanna tusaatissatut tiguarput. Kisiannili oqaluuserinikuunngilarput kina siulittaasutut tullertut innersuussutigissanerlugu, Anders Olsen oqarpoq.
Immikkoortortaqarfiit tusarniarneqassapput
Siumumi alloriarnissaq tulleq tassaavoq allakkiap partiip immikkoortortaqarfiinut tamanut nassiussornissaa, tusarniutigineqassammat. Akissutit ullut ikinnerpaamik qulit qaangiuppata tiguneqassapput.
Anders Olsen Sermitsiaq.AG-mut ilisimatitsivoq allakkiaq pillugu immikkoortortaqarfiit akissutaat tiguneqareersimalerpata ilaasortat isornartorsiuisimasut arfineq-marluusut ataatsimeeqqikkumaartut.
Sermitsiaq.AG-p aatsitassanut suliffeqarnermullu naalakkersuisoq, Erik Jensen (S) apersorusullugu saaffigisimavaa, apeqqutigerusullugu siulittaasuni tatiginngisani qanoq ililluni Naalakkersuisoqatigiinni suleqatigisinnaaneraa.
Aatsitassanut suliffeqarnermullu naalakkersuisoq, Erik Jensen (S) Sermitsiaq.AG-mut nalunaaqutaq 14:50 missarluinnaani ilisimatitsivoq oqaaseqarsinnaanngikkallarluni.