Isornartorsiuisoqartareersorlu: Amerluutit pillugit inersimasut ilinniartinneqalerput
Angajoqqaat, peqqinnissaqarfimmi sulisut inersimasullu allat meeqqanik ulluinnarni sullitaqartut, atopisk eksem - amerluutit pillugit, amerlulinnginnissamullu pinaveersaartitsinermik a ilinniartinneqartussanngorput.
Atopisk eksem - amerlunnerit pillugit, qanoq nakorsarneqartarneri, pinaveersaartinneqarsinnaaneri ammillu paaqqutarineqarnera pillugu innuttaasut annertunerusumik ilisimasaqartariaqarput.
Dronning Ingridip Napparsimmavia eksemskolemik taallugu angajoqqaat, perorsaasut, peqqinnissaqarfimmi sulisut inersimasullu allat meeqqanik ulluinnarni sullitaqartut, amerluutit pillugit ilinniartissallugit suliniuteqalerpoq.
Peqqinnissaqarfik tusagassiorfinnut taama nalunaaruteqarpoq.
Meeqqat amerluutaat pillugit ilisimasakinnerup kingunerisaanik, angajoqqaat meeqqatik nunatsinni nakorsiunnagit Danmarkimut nakorsiussisarnerat pillugu oqaluttuat ukiuni kingullerni arlaqarsimapput.
- Meeraaqqerivinni perorsaasuniit ilinniartitsisunut, angajoqqaat, peqqinnissaqarfimmi sulisut nunaqarfinnilu peqqissaavinni sulisut, nakorsaatit, pinaveersaartitsinerit ammillu paarilluarnissaanut annertunerusumik ilisimasaqartariaqarput, nakorsaq immikkut ilisimasalik, nunatsinnilu dermatologimi akisussaasoq Lone S. Hove tusagassiorfinnut nalunaarummi oqaaseqarpoq.
Ameq pillugu ilisimasat
Meeqqat pingasuugaangata ataaseq amerluuteqarpoq amerluuteqarnikuusimalluniluunniit. Nunanut avannarlernut allanut sanilliullugu meeqqat amerluuteqartut nunatsinni amerlanerujussuusut, nunatsinni misissuinerit takutippaat.
Silaannaap panernerujussua, illup iluani silaannaq, atisanik qaleriissaarnerusumik atugaqarneq, timikkut kingornuttakkat allalluunniit pissutaasinnaapput.
Nakorsap immikkut ilisimasallip pingaartippaa meeqqanik ulluinnarni paaqqutarinnittut amerluutinik ilisimasaqarnerulernissaat. Amerluuteqartummi nakorsarneqartannginnerminni inuuniarnerminni ilungersornerulertarput, sinnarlunnerulertarlutik atuarfimmiluunniit malinnaaniarnerat killeqalersinnaasarluni.
- Susassaqarfimmi ilisimasaqarnerusariaqarpugut, nunatsinnullu tulluartunik ilisimasanik peqatariaqarluta. Ilisimasat tulluartumik tunniunneqarnissaat pingaaruteqarpoq, taamaattumik suliniuteqarpugut, Lone S. Hove oqarpoq.
Amerluutilinnut nakorsiarfissaq
Den A.P. Møllerske Støttefondip suliniut 1 milliuunit koruuninik aningaasaliiffigisimavaa. Suliniummi pikkorissaasoqassaaq ilinniartitsissutinillu suliaqartoqassalluni. Nuummi pikkorissaanerit siulliit aasalernerani ingerlanneqassasut naatsorsuutigineqarpoq, illoqarfiit nunaqarfiillu allat aasamut ukiamullu aamma tikinneqassallutik.
- Paasisat tunniunneqartussat nunatsinni suliaapput, taamaattumillu nunanit allanit "ilaaginnarneqarsimanatik". Amerluutit pillugit peqqissaasumik atorfinitsitsinissaq sulissutigineqarpoq, nunatsinnilu amerluuteqartunut nakorsiartarfissamik pilersitsinissamut suliniutit siulliit aamma aallartereerput, ammimi nappaatit pillugit immikkoortortaqarfimmik pilersitsinissaq kissaatigigatsigu, Lone S. Hove oqarpoq.