Isornartorsiuisoqareersorlu: Gentofte ikinngutigiinnermut isumaqatigiissut isumaqatiginniutigeqqinnissaanut piareersimavoq
Illoqarfiit ikinngutigiinnerannut Tasiilamut isumaqatigiissut ukiunik 30-nik pisoqaassusilik Gentoftep isumaqatiginninniutigeqqissallugu piareersimavoq, kommunalbestyrelsimut ilaasortamit isornartorsiuisoqarnerata kingorna kommuni taama ilisimatitsivoq.
Tasiilap aamma Gentoftep akornanni illoqarfittut ikinngutigiinnermut isumaqatigiissummi ataqqeqatigiittoqarnerullunilu naligiinnerusoqassaaq.
Kommunalbestyrelsimi ilaasortaq Justus Hansen (D), Kommuneqarfik Sermersuumi suliamik qaqitsisoq taama isumaqarpoq.
Gentofte Kommunep isumaqatigiissutip isumaqatiginninniutigeqqinnissaanut piareersimalluni, Sermitsiaq.AG-mut ilisimatitsivoq.
Justus Hansenip ilaatigut meeqqat Gentoftemeersut Tasiilami ilaqutariinnut inissinneqartannginnerannut isornartorsiuivoq, tamannalu meeqqanut kalaallinut Gentoftemut tikeraartunut atuuttarpoq.
- Gentoftemi ilaqutariinnit kommunimiillu meeqqanik atornerluisartutut imerajuttutullu saqqummiunneqartarnerluta kusananngitsumik takorloorpara, Justus Hansen, suliap oqaluuserinissaanut tunngavilersuutimini allappoq.
Kommunimi pisortaq isumaqatigiissutip misissornissaanut piareersimavoq
Sermitsiaq.AG-p isornartorsiuineq Gentofte Kommunemut isummerfigeqquaa. Kommunilli ineqartitsisarnermut tunngasoq pillugu isornartorsiuinermut apeqqut isummerfiginianngilaa, kisianni kommunimi pisortaq Torben Frølich, allagaqarluni akissuteqarpoq, tassanilu isumaqatigiissutip isumaisumaqatiginninniutigeqqinnissaanut piareersimalluni allappoq:
- Ikinngutigiinnermi suleqatigiinnermut soorunami Tasiilami Gentoftemilu ilaqutariinnut iluaqutaallunilu nuannaarutaassaaq, suleqatigiinnerlu oqaloqatigiissutigerusulluinnarparput.
- 1990-mili meeqqat Tasiilameersut Gentofte tikeraartarpaat Danmark misigisaqarfiginiarlugu, illuanillu aamma meeqqat qallunaat Kalaallit Nunaat tikeraartarlugu. Aaqqiissut akuttunngitsumik Tasiilami suleqatigut peqatigalugit oqaluuserisarparput, Kommuneqarfik Sermersuumi isumaqatigiissutip isumaqatiginninniutigeqqinnissaanut kissaateqartoqarpat, taava taamaaliussaagut, kommunimi pisortaq oqarpoq.
Suliarineqarnissaa kinguartinneqartoq
Kommuneqarfik Sermersuup isumaa pillugu apeqqut aatsaat kommunalbestyrelsip ataatsimiinnissaata tulliani akineqassaaq. Justus Hansenip siunnersuutaa marlunngornermi ataatsimiinnermi suliarineqartussaagaluarpoq, kisianni Justus Hansen angalalluni kinguaattoornermini ataatsimiinnermut ilaanngitsoorpoq, suliarineqarnissaalu taamaammat kinguartinneqarpoq, politikeri Sermitsiaq.AG-mut oqaluttuarpoq.
DR-imi aallakaatitassiap "Byen, hvor børn forsvinder"-ip aallakaatinneqarnerata kingorna, kommunimi atuartut Tasiilamut tikeraaraangata angerlarsimaffinni unnuisassanngitsut, Gentofte Kommunip 2019-imi aalajangiuppaa.
- Ilisimasat pissarsiarisavut malillugit, tamanna illersorsinnaanngilarput, taamanikkut kommunimi pisortaq, Torben Frølich, Radio24syv-imut taama oqarpoq. Aallakaatitassiami piviusulersaarusiami inuuniarnikkut ajornartorsiutit kannguttaatsuliornerillu pillugit paasissutissanut.
