Isornartorsiuisoqareersoq: Katiteriaannakkanik sanaartornermi pitsaanerusumik pilersaarusiortoqartarpoq
Betoninik katiteriaannakkanik sanaartorneq arlalitsigut akikinnerusartoq paasinarsisimavoq, aamma katiteriaannakkanik sanaartornermi pitsaanerusumik pilersaarusiortoqartarpoq, Namminersorlutik Oqartussat Sulisitsisisut isornartorsiuereersut oqaatigaat.
Siullertut sanaartortitsisut aalajangigassaraat sanaartornerup qanoq aaqqissuunneqarnissaa, aamma atortut suut atorlugit sanaartortoqarnissaa. Tulliullugu Namminersorlutik Oqartussat isumaqarput, betonimik sanaartorfimmi kuisisarnermut sanilliullugu sanaartorfimmi betoninik katiteriaannakkanik sanaartorneq arlalitsigut iluaqutissartaqartoq.
Namminersorlutik Oqartussat sulisitsisut kattuffiata Sulisitsisut sakkortuumik isornartorsiuereersut taamatut ilisimtitsipput.
Sulisitsisunit naammagineqanngilaq, ilinnartut ineqarfissaannik nutaanik hunnorujulikkaanik sanaartornermi betonit katiteriaannakkat atorlugit ingerlatsinissaq.
Sulisitsisut isumaqarput, taamatut sanaartortitsiniarnermi najukkami suliffeqarfiit neqerooruteqarsinnaasut killilerneqangaatsiartut, taamatummi sanaartoriaaseqarneq Kalaallit Nunaanni maannamut atugaavallaanngimmat.
Akikinnerusoq sulinermilu atugassarititaasut pitsaasut
Ineqarnermut Naalakkersuisoq Karl Frederik Danielsen pineqartoq pillugu apersorneqarnissamut piffissaalatsisimavoq, Ineqarnermulli Attaveqaatinullu Naalakkersuisoqarfiup allakkatigut akissuteqarnermi, katiteriaannakkanik sanaartorneq arlalitsigut iluaqutissartaqarnerarpaa:
Katiteriaannakkanik sanaartorneq illersorneqarsinnaasumik aamma ukiakkut/ukiukkut sulinermi atugassarititaasut pitsaanerusut atorlugit ingerlanneqartarpoq,
”Ukiukkut betoni kuisaq” atorlugu sanaartornissaq annertunerusumik aningaasartuutitaqartartoq, ukiukkut silap +5° ataallugu kiannerani sulinermi periuserineqartartut akisunerusarnerat pinngitsoortinneqassaaq,
Ikkussugassat upernaap aallartinnerani aasallu ingerlanerani ikkussorneqartarput, aamma
Sanaartornermi piffissaq sivikinnerusoq atorneqartarpoq, sanaartukkat ukiuutinnagu matoreerneqartarput, iluatungaanilu sanaartugassat qalialeriikkami suliarineqarsinnaallutik.
Taamaammat katiteriaannarnik sanaartortarnerup akikinnerunera ilisimaneqarpoq:
- Siusinnerusukkut neqeroortitsinerup takutissimavaa, in-situ atorlugu betonimik kuisisarnissamik allatut neqerooruteqartarneq imminut akilersinnaasarsimanngitsoq, kingullermik in-situ atorlugu betonimik kuisisarnissamik neqeroortoqarmat betoni betonimut katiteriaannakkamut sanilliullugu 20 procentip missaanik akisunerusimavoq, naalakkersuisoqarfik allappoq.