Isornartorsiuinerup kingorna Ruslandip arferit 100-t iperalerpai
Ilaatigut Leonardo DiCapriop kajumissaarinerata kingorna, aarluit qulit aamma qilalukkat qaqortat 87-t Ruslandimit iperarneqalerput.
Russit oqartussaat arferit 100-t qaammatini arlalinni mattunneqarsimasut iperarneqarnissaannut isumaqatigiissut ataasinngornermi atsiorpaat.
Katillugu aarluit qulit aamma qilalukkat qaqortat 87-t killilerujussuarmi assiaqusersukkami Ruslandip kangianiittumi tigummineqarsimapput.
Tamanna ilaatigut isiginnaartitsisartumit aamma isumanik siaruarterisumit Leonardo DiCapriomit isornartorsiuinermik kinguneqarpoq. Taanna arferit iperarneqarnissaannik kaammattuisumik atsiornernik katersuiniarneq pillugu Twitterimi allagaqarpoq.
Katersuiniarnermi millionit aappaata affaat avillugu atsiortoqarpoq.
Nakhodkami illoqarfimmi arferit imiisivinni mikisuni mattunneqarsimasut assit saqqummermata isornartorsiuisoqalernikuuvoq.
Arferit aasaq kingullerli tigummineqalersimapput.
Tuniniarneqarnissaat pilersaarutaagaluarpoq
Ingerlatseqatigiiffiit tigusisuusut Kinami parkini aamma akvarianut tuniniarneqarnissaat pilersaarutigisimagaluarpaat.
Russit naalakkersuisuisa siornatigut nassuerutigereerpaat, arferit tigummineqarnermini atugaat sakkortuallaartut. Kisianni aamma ajoqusernagit iperarneqarnissaat ajornakusuussasoq oqaatigineqarnikuuvoq.
Kisianni nunani tamalaani ilisimatuut russit ilisimatuui peqatigalugit ataasinngornermi isumaqatigiissusiorput. Isumaqatigiissut najukkami oqartussanit taperserneqarpoq, arferillu iperaneqarnissaannik tamanna kinguneqarpoq.
Nunani tamalaani ilisimatuut akornanniippoq Jean-Michel Cousteau. Taassuma angutaa toqoreersoq tassaavoq ilisimasassarsiorluni angalasartoq aamma imaq pillugu ilisimatooq Jacques Costeau.
Taassuma ataasinngornermi isumaqatigiissutigineqartoq attortinnartuunerarpaa, arferillu peqqissusaasa qulakkeerneqarnissaat ajornakusuussasoq taassuma nassuerutigaa.
- Nalunngilara suliaq ilungersornarumaartoq. Kisianni iluatsinnissaa qularutiginngilara, Jean-Michel Cousteau oqarpoq.