Skip to main content

Isornartorsiuinerup kingorna: Politikerit inuusuttoq aallarnisaasoq naapikkusuppaat

Sapaatip akunnerata siuliani JJ Lennert-Sandgreenip politikkerit aallarnisaasunik unittooqqatitsisarnerat sakkortuumik isornartorsiorpaa. Maanna isornartorsiorneqartut ilaasa tusarusullugu qaaqquaat

Sapaatip akunnerata siuliani inuusuttoq aallarnisaasoq JJ Lennert-Sandgreen bloggimik ilanngutassiilluni politikerinut sakkortuumik isornartorsiuivoq.

Aallarnisaasut aamma Kalaallit Nunaanni ineriartorneq akimmiffilersoraat taanna isumaqarpoq.

- Tamassi, tassa politikerit tamaavissi kukkuvusi, taanna ilaatigut allappoq.

Saqqummiussassaq piareerpoq
Maanna politikerit arlallit suna kukkussutiginerlugu JJ Lennert-Sandgreenip isumaa tusarluarusuppaat.

- Inuusuttunut pitsaasumik nukittuumillu pilersitsiniartunut ajornakusoortitsnerput nikalluallaatigeqaara - uagullu inuiaqatigiittut taamatut immitsinnut naalleraannerput, Kommuneqarfik Sermersuumi borgmesteri Asii Chemnitz Narup (IA) ilaatigut Facebookimi allappoq, taassumalu JJ Lennert-Sandgreen kaffisoqatiginissaanut aggersarpaa.

Taanna inuusuttoq qaaqqusissummut akuersereerpoq.

Siumup aamma partiimut apriilimi saqqummiinissaanut qinnuigaat, taamatullu aamma Inuit Ataqatigiit Inatsisartunut ilaasortaat qaaqqusipput.

Atuaruk: Inuussuttoq aallarnisaasoq politikerinut: Ilissi ajornartorsiutaavusi!

Aallarnisaasullu anersaavat atorlugu JJ Lennert-Sandgreenip politikerit suna ajornartorsiutaanersoq oqaluttuarinissaanut piareersalereerpoq.

- Saqqummiussassaq siulleq atugassara piareereerpara, Sermitsiaq.AG-mut oqarpoq.

Saqqummiussassaq ataavartumik JJ Lennert-Sandgreenip saqqummiinermini isummersorfigineqareernerani nutarsarneqartassaaq.

Ajortumik qisuariartoqarnissaanut aarlerisaarutit
Sapaatip akunnerata siuliani allaaserisami saqqummiunnerata kingorna aallarnisaasup qanoq tiguneqassanersoq pissangassutigisimavaa.

- Nassuerutigisariaqarpara qanoq qisuariartoqassanersoq ernumassutigilaarsimalugu. Kisianni siullermik qisuariaatit ajunngitsut amerlanerupput.

Aallarnisaasut allat aamma inuusutissarsiortut arlaqartut isornartorsiuinermik tapersiisimasut, JJ Lennert-Sandgreenip oqaluttuaraa. Taakku tamakkerlutik saqqummerusussimanngillat, siunissaminnut qanoq sunniuteqarsinnaanersoq ilisimannginnamikku.

Pisortat aningaasaqarnermi naalagaangaarmata akerlilerusuppallaanngilaat.

Allaaserisaata Kalaallit Nunaanni aallarnisaasutut siunissaa ajoqusersinnaagaa aamma JJ Sandgreen aarlerisaarneqarsimavoq.

Tamanna nutaamik allaaserisaqarneranik kinguneqarpoq.

- Allaaserisaq allallugu aallartikkakku  nammineq akisussaaffigissallugu piareersimavunga. Taamaassappallu immaqa oqariartuutiga tunngaviliinnassavaa. Soorunami neriuutigaara pisinnaasannik tapeeqataallunga inooqataanissanut inissaqarlunga, taanna allaaserisamini nutaami allappoq.

Sinaakkutit allat ineriartortitsissapput
Taassuma maanna aallarnisaasut inuussutissarsiortullu katersorniarsarilerpai, taakku aallarnisaasunut aporfiit sumiinnerinik pisortanut nassuiaaqataasinnaassapput.

JJ Lennert-Sandgreenip saqqummiinermini politikerit sinaaakkutinik aallarnisaasunut ineriartortitsisinnaasunik pilersitsinissamut kajumilersitsiniarpoq, taakku aningaasaqarnikkut namminersulernissamut nammassisuusinnaasssammata.

Siunissami oqaluttuarisaanermi atuakkat politikerit sinaakkutanik taakkuninnga pilersitsisut oqaluttuarineqarnissaat neriuutigaa.

- Taakku politikerit aallarnisaanermut avatangiisinik orniginartunik pilersitsisuupput, inuussutissarsiornerlu ammasoq ilaatigut ingerlatseqatigiiffiup uuma pilersinneqarneranik kinguneqartitsisoq, ingerlatseqatigiiffillu taanna mikisuminngaanniik allingaarami Kalaallit Nunaata namminersulivinneranut tunngavileeqataasoq, taanna allaaserisamini nutaami allappoq, pissanngatigaalu taakku politikerit kikkuujumaarnersut.

Maannamut tusarnaarusummata nuannaarutigaa. Neriuutigisimavaami kajumissaarsinnaassallugit; kisianni aamma arlallit imminut illersorniarlutik inissinnissaat ernumassutigisimagunarpaa.

- Maanna takorluukkakka taakkununnga saqqummiussinnaanngorakkit nuannerluinnarpoq, taanna oqarpoq.

JJ Lennert-Sandgreenip partiit tamaasa namminersulivinneq, aallarnisaanermut anersaaq aamma nunat tamalaat qiviarlugit paasisimasaqarnissaq silarsuarmini ataqatigiinnersut nassuiaassinnaassallugit neriuutigaa.

Velkommen til debatten
  • Oqallinneq malinnaaffigalugulu peqataaffigerusukkukku cookie akuerissavat.
  • Sermitsiaq.AG-p atuartartut akunnerminni isumaqatigiinngikkaluarpataluunniit kissaatigaa, pitsaasumik oqallittoqartarnissaa. Oqallinnissamut malittarisassavut unioqqutinneqarpata oqallinnermut peqataaqqusaajunnaartitsisoqarsinnaavoq.oq .
  • Peqqarniitsumik oqaaseqartoqarsimaneranik nalunaarutiginnittoqarsinnaavoq, "rapporter" toorlugu imaluunniit ”markere som spam” toorlugu”.

Forsiden lige nu

SENESTE NYHEDER