Isornartorsiuineq: Sinerissap qanittuani qaleralinniarnermut tunngatillugu siunnersuut ersernerluttoq

Danskit kalaallillu nalunaarutissatut nutaatut siunnersuutaat imminnut naapertuutinngillat, Avannaata Kommunia aamma Aalisartut Piniartullu Peqatigiiffit oqarpoq

Tusarniaanermut piffissaliussaq sivikippallaaqaaq aamma kalaallisut qallunaatullu oqaaseqatigiiliorneqarsimanerat imminnut ataqatigiinngillat. Ilulissani Aalisartut Piniartullu Peqatigiiffiani siulittaasup Johan Villadsenip aamma Avannaata Kommuniani borgmesterip Palle Jeremiassenip (S) sineriammut qanittumi qaleralinniarneq pillugu nalunaarutissap nutaap tusarniaassutigineqarneranut isornartorsiuinerat taamatut nipeqarpoq.

Kalaallisummi qallunaatullu oqaaseqatigiilioneri imminnut ataqatigiinngillat.

- Oqaaseqatigiiliorneqarnerimi assigiinngitsumik paasineqarsinnaapput, oqaatsillu sorliit malinneqarnissaat apeqqutaatillugu ilaatigut Avannaata Kommuniani aalisartunut kommunimullumi kingunerlussinnaavoq, tusagassiorfinnut nalunaarummi taamatut allassimasoqarpoq.

Aamma taakku marluullutik isumaqarput, tusarniaanermi piffissaliunneqartoq qaammatip missarluinnaanik sivisussuseqartoq sivikippallaartoq. Tamaammat piumasaraat, tusarniaassutigineqartumut akissuteqarnissamut piffissaliussaq sivitsorneqassasoq, Namminersorlutik Oqartussat taamaasillutik tusarniaassutigineqartumi kalaallisut qallunaatullu oqaasertaliunneqartunik aaqqiissuteqarsinnaalerlugit.

Powered by Labrador CMS