Isornartorsiuineq: Isumalioqatigiissitat innuttaasunik peqataatitsinermut taarsiullugu ilisimatitsinermik suliaqarput

Tunngaviusumik inatsisissaq pillugu Isumalioqatigiissitat 2020 aamma 2021 killilimmik taamaallaat innuttaasunik peqataatitsipput, naak innuttaasunik peqataatitsineq suliassat nalunaarsorsimaffiannit septembarimi 2021-mi aatsaat peerneqaraluartoq, EY Kalaallit Nunaata misissuinerani tamanna paasineqarpoq.

Kukkunersiuisarfiup EY Kalaallit Nunaata Tunngaviusumik inatsisissaq pillugu Isumalioqatigiissitat aningaasanik atuinerat misissorpaa, pingasunngornermilu kukkunersiuisarfiup isumalioqatigiissitanut tunngatillugu aningaasaqarnikkut pissutsit pillugit arlalinnik isornartorsiuinera Sermitsiaq.AG-p oqaluttuaraa.

EY Kalaallit Nunaata tamatuma saniatigut Tunngaviusumik inatsisissaq pillugu Isumalioqatigiissitat suliassat nalunaarsorsimaffiannut tunngatillugu sulinerat aamma misissorsimavaa, tassanilu aamma isumalioqatigiissitat isornartorsiorneqarput.

Isumalioqatigiissitat 2020-mi aamma 2021-mi suliaat – 2020-mi innuttaasunik peqataatitsisumik misissuineq eqqaassanngikkaanni – innuttaasunik paasititsiniaanerusut peqataatitsinerunatik, kukkunersiuisarfiup aamma inerniliuppaa, isumalioqatigiissitallu suliassarisimasaani tamanna allaqqasimagaluarpoq:

- Tusagassiuutit nutaaliat atorneqarsinnaagaluartut

- Tunngaviusumik inatsisissaq pillugu Isumalioqatigiissitat piffissami 2020-mit septembarimi 2021-p tungaanut innuttaasunik peqataatitsinissap atorunnaarsinneqarnerata tungaanut, siornatigut suliassat nalunaarsorneqarsimaneranni innuttaasunik peqataatitsinissamik piumasaqaatit naapertorlugit sulisimanngitsoq, ataatsimut isigalugu nalilerparput, EY Kalaallit Nunaat allappoq.

Kukkunersiuisarfik naapertorlugu innuttaasunik peqataatitsineq Tunngaviusumik inatsisissaq pillugu Isumalioqatigiissitanut siunnersuutinik piffissami killilimmi periarfissaqartitsivoq. Isumalioqatigiissitat piffissami tassani ilinniarfeqarfinnik, peqatigiiffinnik aamma suliffeqarfinnik annerusunik oqaloqateqarnissaq anguniarsimavaat.

- COVID-19-ip malitsigisaanik angalanissamut killilersuisoqaraluartoq, Tunngaviusumik inatsisissaq pillugu Isumalioqatigiissitat innuttaasunik peqataatitsinissamik piumasaqaat tusagassiuutit nutaaliaasut iluaqutigalugit naammassinnissinnaagaluartut nalilerparput, EY Kalaallit Nunaat allappoq.

Isumassarsiorluni angalaneq isornartorsioraat

Kukkunersiuisarfiup aamma decembarimi 2021-mi Islandimut angalaneq isornartorsiorpaa.

Suleqatigiissitat Arctic Circle Icelandimut peqataanissaannut Isumalioqatigiissitat tassani 101.000 koruunit atorpaat. Arctic Circlemut ataatsimeersuariarnermut peqataanermut piffissaq EY Kalaallit Nunaata eqqarsarnartoqartippaa:

- Isumassarsiorniarluni aamma nunani allanit suliaqartunit siunnersuuteqarfigineqarniarluni Arctic Circle Icelandimut peqataaneq, suliap ingerlanerani taama kingusitsigisumi inissinneqartariaqanngitsoq nalilerparput, EY Kalaallit Nunaat allappoq.

Isumalioqatigiissitat sulinerat piffissami tassani pilersaarutaasimasumut sanilliullugu ukiunik arlalinnik kinguaattooqqanera, isornartorsiuinermi eqqarsaatigineqassaaq.

Sipaarniarluni pissusilersornerunngitsoq

- Suliassat nalunaarsorneqarneranni nunanit allanit suliaqartunit siunnersuuteqarfigineqarnissaq ilaanngitsoq erseqqissaatigissavarput. Taarsiullugu suliassat nalunaarsorneqarneranni ilisimasalinnik ilaasortaatitaqarnissamut peqataatitsinissamullu innersuussivoq, EY Kalaallit Nunaat allappoq.

Isumalioqatigiissitat aamma angalanermut tunngatillugu sipaarniarlutik pissusilersorsimannginnerat nalilerneqarpoq, ilaatigut isumalioqatigiissitat 2017-imi aamma isumassarsiorlutik angalasimanerat pissutigalugu.

Ineqi Kielsen piffissami tassani Tunngaviusumik inatsisissaq pillugu Isumalioqatigiissitani siulittaasuuvoq. EY Kalaallit Nunaannit misissuineq oqaaseqarfigiumanngilaa, misissuineq nammineq tigusimannginnera pissutigalugu. Misissuineq Siulittaasup Naalakkersuisoqarfianit suliakkiussaavoq.

Powered by Labrador CMS