Isornartorsiuineq: AWG-p erinarsuutaa nipilersortartumit issittumeersumit atorneqanngilaq
Arctic Winter Gamesimik aaqqissuisut erinarsortartumik Canadap kujataaneersumik erinarsuummik atorneqartumik toqqaammata, erinarsortartup Nunavumeersup isornartorsiorpaa
Ukiut marluk matuma siorna kikkut tamarmik ‘We are the Arctic’ Small Time Giantsikkut atugaat erinarsoqattaarpaat. Nipilersoqatigiit Qaqortumeersut Nuummi Arctic Winter Gamesertoqarnissaannut erinniortussatut toqqarneqarnikuupput.
Kisianni ukiormanna North West Territoriesimi AWG-imi najugaqartumik nipilersortartumik toqqaasoqanngilaq, illuanik Serena Ryder, Canadap kujataani Ontariomeersoq toqqarneqarpoq. Taassuma erinarsugaa ‘Be the Ones’ AWG 2018-ip erinarsuutigissavaa.
Tamannalu erinarsortartup Nunavumeersup pakatsissutigaa.
- Issittumeersumik toqqaasimanissaat kissaatigigaluaqaara, taanna CBC Northimut oqarpoq.
Nipilersortartut assigiinngitsut attaveqarfigigaat
Kelly Fraserip Serena Ryder nuannaartorisaralugu oqarpoq, kisianni nipilersortartut najugaqartut siunissami toqqarneqartarnissaat neriuutigaa.
- Arctic Winter Games pakatsissutigisorujussuuara, taanna oqarpoq.
Todd Shaferip, AWG 2018-imut pisortaasup, nipilersortartut assigiinngitsut attaveqarfigineqarsimasut oqaatigaa, Serena Ryderilu qisuariarsimavoq.
- Avannaanut soqutiginnippoq, tamannalu uagutsinnut tulluarpoq, taanna CBC Northimut oqarpoq.
Nipilersortartulli North West Territoriesimeersut aammaanersiornermi aamma naggataarnersiornermi tusarnaartsitsinissaat oqaatigaa. Serena Ryder nammineerluni AWG-imi tusarnaartitsissanngilaq.
Erinarsuut ‘Be the Ones’ Pan Am-imi Torontomi 2018-imi erinarsuutissatut suliarineqaraluarpoq, kisianni taamanikkut saqqummersimanngilaq.