kommunit
Isornartorsiuineq: Siumup siunnersuutaa Dansk Folkepartimut eqqaanartoq
Martha Lund Olsenimit inatsisissatut siunnersuut kommunit nammineersinnaassusaannik imaannaanngitsumik saassussineruvoq, borgmesteri Asii Chemnitz Narup taama isumaqarpoq
Kommuneqarfik Sermersuumi borgmesteri Asii Chemnitz Narup, isumaginninnermut naalakkersuisumut Martha Lund Olsenip kommunit isumaginninnermut immikkoortortaannut akuliussunnaanermut inatsisissatut siunnersuutigisaanut nersualaaruteqarlunilu isornartorsiuivoq.
Inatsisip illoqarfinni nunaqarfinnilu arlalinni isumaginninnerup tungaatigut ingerlanerliortoqarnissaa pinngitsoortissavaa.
Atuaruk: Meeqqanut suliassani kusanaatsuliortoqarnissaa inatsisip nutaap pinngitsoortissavaa
Borgmesterip siunnersuummi isumaqataaffigisani siulliullugu taakkartorpaa. Tassa, Namminersorlutik Oqartussat isumaginninnermut tunngasuni meeqqat pineqartillugit malinnaasinnaanerat.
Kommunip pissaanera peerneqassasoq
Namminersorlutik Oqartussalli kommunit ingerlatsinerini aalajangiisinnaanerat, IA-mi politikerip isumaqatiginngilaa.
- Siunnersuut naapertorlugu kommunimi nammineersinnaassuseq innarlerneqassaaq, peqataanillu kommunimi missingersuusiorniarneq ajornarsitissallugu, taanna kommunimit tusagassiuutinut nalunaarummi oqarpoq.
- Politikeritut akisussaasutut isumaginninnermut suliassaqarfiup taama annertutigisup aqussinnaannginnera akuersaarsinnaanngilarput. Inatsisissatut siunnersuuteqarnermi Martha Lund Olsenip suliassaqarfimmik tigusinissaminut siunniussaqarpoq uagullu qanoq iliuuseqarfigisinnaanngisatsinnik kommunimi missingersuutinik qanorluunniit atuisinnaalluni, Asii Chemnitz Narup ilanngullugu oqarpoq.
Qallunaat iliuusaat oqallisaasoq
Illoqarfiit pingaarnersaata missingersuutaata affaata missaaniittut isumaginninnermut atorneqartarput.
Kalaallit Nunaanni meeqqat pillugit suliassaqarfik annertuumik oqallisigineqarpoq, qallunaallu folketingimi politikerit siunnersuuteqarput, nammineerluta ilaqutariinnermut suliarpassuit akiorsinnaanngikkutsigit, Danmarki iliuuseqarluni ikiuuttariaqartoq.
Atuaruk: Perorsaasut ilinniartitsisullu meeqqat illersuisuat taperserpaat
Siumup siunnersuutaa nutaaq, Søren Espersenip (DF) Kalaallit Nunaanni namminersornermit meeqqanut suliassaqarfik arsaarinnissutigineqarnissaanik kissaataanut, Chemnitz Narupip assersuuppaa.
Atuaruk: Dansk Folkepartip namminersorluni oqartussaqarneq utertinniarpaa
- Siunnersuutigineqartoq Dansk Folkepartiip Namminersorlutik Oqartussanit meeqqanut suliassaqarfimmik arsaarinnilluni tigusinissamut siunnersuutaanut eqqaanarteqaara, ilaatigut partiimit isumaqartoqarsimammat kalaallit meeqqanut tunngatillugu suliassaqarfimmik aqutsisinnaanngitsut. Tamanna Naalakkersuisunit itigartinneqarpoq, tunngavilersuinerilli taakkorpiaat kommuninut atorpaat, Narup erseqqissaavoq.
Atuaruk: Meeqqat pillugit siunnersuut MIO-mit tapersersorneqarpoq