Isornartorsiuineq sakkortooq: Inoorlaaq qaratsamigut aanaartoorsimasoq ukiuni pingasuni utaqqisinneqartoq
Anaanaasoq panimmi inorluni inunngornikup qaratsamigullu aanaartoorsimasup tapersersortitut ikiortilerneqarnissaa pillugu Qaasuitsup Kommunianut ukiuni pingasuni ilungersuuteqartariaqarsimavoq. Kommunip piffissami sivisuumi sulliniarsimanera pillugu ombudsmandip sakkortuumik isornartorsiorpaa.
Anaanaq septembarimi 2013-imi panini inorluni inuusimasoq, qaratsamigullu aanaartoorsimasoq tapersersortitut ikiorsiissuteqalernissaanik Qaasuitsup Kommunianut piumasaqarpoq. Anaanaasooq tapersersortitut ikiortissamik februaarimi 2017-imi aatsaat ikiorserneqarpoq, ukiullu affaa qaangiuteqqimmat aatsaat kommuni aalajangerpoq ikiorsiineq innarluutilinnut ikiorsiinemut malittarisassat malillugit atuussinnaasoq.
Akuerineqarsinnaanngilaq
Ombudsmandip oqaaseqaataa malillugu ”piffissaq suliamik suliarinninnermut atorneqartoq akuerineqarsinnaanngitsoq isorisarialerujussuarlu pineqartoq – suliassaqarfimmi tassani sulisussaaleqisimaneq apeqqutaatinnagu”.
- Ombudsmandi aammattaaq inerniliivoq suliami annertuutigut sunniuteqartunik kukkussuteqartoqarsimallunilu sumiginnaasoqarsimasoq, taamaattumillu ilaatigut Inatsisartut Inatsisinut Ataatsimiititaliaat suliamik Ombudsmandi pillugu inatsimmi § 23 tunngavigalugu ilisimatillugu.
Kommunip nassuiaataa
Suliap piffissami sivisuumi suliarineqartariaqarneranut innarluutilinnut tunngatillugu sulisunik amigaateqarnermik pissuteqartoq kommuni nassuiaavoq. Nassuiaalli ombudsmandimut naammanngilaq.
Oqartussat suliamik qanoq sivisutigisumik suliaqassanersut pillugu malittarisassaqanngilaq. Taamaakkaluartoq ”suliat pisariaqarneranit sivisunerusumik suliarineqartannginnissaat ingerlatsinermi ileqqorissaarnerup nassatarigaa”, ombudsmandi allappoq.
Suliap sivisuallaamik suliarineqannginnissaanut siunissami qanoq pinaveersaartitsisinnaanersoq isumaliutersuutigeqqullugu, ombudsmandip kommuni piumaffigaa .
Taarsiiffigitinnissaq
Arnaq ombudsmandimut suliakkiisoq isumaqarpoq taarsiiffigitinnissamut pisinnaatitaaffeqarluni. Tamannali pillugu ombudsmandi isummersimanngilaq.