Isornartorsiuineq: Naalakkersuisooqatigiinnissamut isumaqatigiissutip danskisut nutserneqarnera sivitsorpoq

Siumut, Atassut aamma Demokraatit Naalakkersuisooqatigiinnissamik isumaqatigiissutertik atsioqatigiiffigaat decembarip sisamaani. Isumaqatigiissutigineqartoq partiinut, tusagassiuutinut, inunnut aalajangersimasunut, suliffeqarfinnut peqatigiiffinnullu nassiussuunneqarpoq.

Kisianni isumaqatigiissutip danskisoortaa ulloq manna tikillugu suli saqqummiunneqanngilaq.

Inatsisartuni ilaasortap Inuit Ataqatigiinneersup Naaja Nathanielsenip tamanna uumitsaatigaa. Facebookimi quppernermini ima ilaatigut allappoq:

- Nalunngikkaluarpara isumara nuannarineqarpallaanngitsoq, kisianni Naalakkersuisooqatigiinnissamik isumaqatigiissut suli danskisut saqqummiunneqannginnera uumitsaatigaara. Kalaallit Nunaanni innuttaasut tamarmik sullinneqassappata aamma kikkut tamarmik peqataatinneqartariaqarput. Naalakkersuisooqatigiinnissamik isumaqatigiissuteqartut akunnerup naanerani danskisoortaa saqqummiutinngimmassuk paasisinnaavara. Maannakkulli pingasunngorneruvoq. Neriuutigaara ullumi saqqummissasoq, taamaasillunga aamma inuiaqatigiit akornanni isumaqagiissut oqaloqataasinnaassaanga.

Quppernerit 22-t
Naalakkersuisooqatigiinnissamik isumaqatigiissut 'Ataatsimoorneq, toqqissisimaneq, ineriartorneq' qulequtaraa. Tassani sammisat 29-t allaqqapput quppernerni 22-ni.

Isumaqatigiissutip danskisoortaata sooq kinguaattooqqanera Sermitsiaq.AG-mit Siumumi allatsip Mikael Petersenimut apeqqutiginiarneqaraluarput iluatsinngitsumik.

Naalakkersuisooqatigiilertussat ataatsimeeqatigeereerpata Naalakkersuisunngortussat ilisaritinneqassapput. Ataatsimiinnerat aallartissaaq pingasunngornermi nalunaaaqutaq 15.00.

Assi ataaseq kiisalu isumaqatigiissutip saqqaa ataani takuneqarsinnaapput