Isornartorsiuineq: Kruse naalakkersuisoqarfinilu kingusinaarlutik iliuuseqarput

Peqatigiiffik arlaannaanulluunniit attuumassuteqanngitsoq ileqqorluttoqannginnissaanik nakkutiginnittoq Transparency International Greenland, aalisarnermut naalakkersuisoq, Karl-Kristian Kruse (S) naalakkersuisoqarfinilu tutsuiginarnerusumik avaleraasartuunik pisassiinerminni iliuuseqartariaqarsimagaluartut isumaqarpoq.

- Ilisimasaqannginneq utoqqatsissutaasariaqanngikkaluarpoq, Transparencymi siulittaasoq, Anita Hoffer, Nuuk TV-mut oqarpoq.

- Namminermi piginnittuunini, kingornalu ilaquttami piginnittuulernerat pillugu mianersortariaqarnerminik pasitsatsitsisinnaagaluarmat, tamanna qularutissaanngilaq.

Nuuk TV-mi ilanngutassiaq takuuk: Ilisimasaqannginneq utoqqatsissutissaanngilaq

Taassuma Aalisarnermut Naalakkersuisoqarfik piffissaatillugu pisassiisarnermi tutsuiginassusertik attatiinnarlugu, nalunagu aalisartoq Karl-Kristian Kruse naalakkersuisunngortoq isumaliuutiginnissimannginnera isornartorsiorpaa.

Ilaqutaasut pissarsingaatsiartut
Taamatut pisoqarnerani ilaatigut Karl-Kristian Krusep ilaqutaanut qaninnerpaanut 30-40 millionit koruuninik nalilinnik pisassiissuteqartoqarpoq - taamaattorli Krusep aamma naalakkersuisoqarfiata naalakkersuisoq attuumassuteqarpallaarnerarlugu nalunaarutigereeraat pivoq.

Tallimanngormat sapaatip akunnerani kingullermi Aalisarnermut Naalakkersuisoqarfik allakkatsigut nalunaarummik nassiussivoq, ingerlatsinermut paasissutissiineq siunnersuisunit Deloittemeersunit pisassiinermut aalisanermut naalakkersuisoqarfimmi ingerlaneq akueripajaareeraat.

Atuaruk: Siunnersortit: Avaleraasartoortassiineq ajunngitsumik ingerlasimavoq

Nuuk TV Deloittep ingerlatsinermut paasissutissiissutaanik atuaaqqissaarsimasoq naapertorlugu, politikerit aamma soqutigisaqatigiiffiit arlaleriarlutik naalakkersuisoq qaqugukkut attuumassuteqarpallaartutut suliamit nalunaaritiginnissimanera paasiniarsimagaluarpaat.

Deloittemit isornartorsiuineq
Maaji tamaat oqallittoqarnerani taakku Namminersorlutik Oqartussanit erseqqissumik akissutissarsisinnaasimanngillat.

Siunnersuisartunillu nalunaarusiaq isornartorsiuinngitsuunngilaq.

Deloittep uparuarpaa, Karl-Kristian Kruse (S) KNT-imik piginneqataassutsini aatsaat februaarimi tunniummagu, tamanna suliffeqarfiup avaleraasartuunik pisassiissutinik millionilikkaanik nalilinnik qinnuteqareernerata kingorna pivoq.

Naalakkersuisoqarfimmit kingusissukkut aalajangerneq
Tullissaanik kingusissukkut aatsaat attuumassuteqarpallaarnini peqqutigalugu tunuarpoq, tamanna ajoqutaasussaasoq nalugamiuk.

Naalakkersuisoqarfiup maajip arfineq-pingajuanni Karl-Kristian Kruse attuumassuteqarpallaarmat avaleraasartuunik pisassiinermit tunuassasoq aalajangiuppaa, naalakkersuisoqarfiup suliamik ingerlatsineranut isornartorsiuilluni Deloitte allappoq, taamatut pisoqarsinnaaneranik ilisimannittuussaagaluaramik, inuussutissarsiutigalugu aalisartoq naalakkersuisunngorpat.

Allaaserisat avaleraasartuunut tunngasut tamaasa uani atuakkit