Isornartorsiuineq imaaginnavippoq

Illuatungiliuttut Naalakkersuisut aamma Aalisarnermut Piniarnermullu Naalakkersuisoqarfiup tammajuitsussanik piniartitsinermi kanngunartuliamik suliarineqarnerat assut naammaginngilaat.

Siumup siulitaasuata Erik Jensenip tammajuitsussanik piniartitsisarneq pillugu kanngunartuliorneq kamaatigaa: – Tamanna ajorluinnarpoq, aamma kanngunarluinnarpoq taamak sivikitsigisumik tusarniaanerup ingerlanneqarnera 2. juuli killigitillugu kiisalu 12. juuli saqqummiussilluni, piffissami tassani aallaaniat siulliit tikereersimapput aamma aallaarniarnissaminnut piareersimallutik.

Naalakkersuisunit isornartorsiuineq imaaginnavippoq, Kangerlussuup eqqaani tamajuitsussanik piniartitsineq pillugu nalunaarutip nutaap kingornatigut tammajuitsussanik piniartitsisarneq juulimi inerteqqutaalermat. Nalunaarut 12. juuli tamanut saqqummiunneqarpoq piffissami tassani tammajuitsussanik piniartitsinermut allagartat tunineqareersimapput, kiisalu nunanit allanit aallaarniartartut mittarfimmut tikereersimallutik piniarnissaminnullu piareersimallutik, aviisi Sermitsiaq allappoq.

Illuatungiliuttut siuttuat Erik Jensen, Siumup siulittaasua, Naalakkersuisut suliamik suliarinninnerat pillugu assut kamappoq:

– Ingerlatsineq kukkulluinnartumik pisimavoq. Tunngavilersuut akuerisinnaanngilara nalunaarutip kinguaattoorneranut apriilimi qinersineq pissutaanerarneqarmat. Qinersineq akimmiffiusimappat taava nalunaarut pisoqaq ukiumik ataatsimik sivitsuinnarneqarsinnaagaluarpoq.

– Tamanna ajorluinnarpoq aamma kanngunarluinnarpoq taamak sivikitsigisumik tusarniaanerup ingerlanneqarnera 2. juuli killigitillugu kiisalu 12. juuli saqqummiussilluni, piffissami tassani aallaaniaat siulliit tikereersimapput aamma aallaarniarnissaminnut piareersimallutik. Tamanna tassaaginnanngilaq ingerlatsinermi ileqqumik pitsaanngitsumik ingerlatsineq, tamanna aammattaaq Nunatsinnut takornariaqarfittut tusaamaneqarneranut ajoqutaavoq, Erik Jensen, Sermitsiamut oqarpoq.

Ajormat allanngortittariaqarpoq

– Naliliinermut sakkortusaataavoq upernaarli ilimasaarutigineqarmat allanngortitsisoqassanngitsoq – taavalu nalunaarut saqqummiunneqarmat piffissaq piniarfiusartoq qaammammik ataatsimik ilanngarneqarsimavoq. Tamanna ajormat allanngortittariaqarpoq.

Erik Jensenip paasisinnaavaa Qeqqata Kommuniata tusarniaanermut akissuteqaatimini tammajuitsussanik piniartitsinermi juulip peerneqarnissaa kissaatigimmagu, piniartut aamma Kangerlussuup eqqaani qangaaniilli piliniartarnerit ingerlanneqartartut eqqarsaatigalugit.

Allaaserisaq tamaat uani Sermitsiami atuaruk:

Powered by Labrador CMS