valg
Isornartorsiuineq: Borgmesteri pingaarniakujuttoq
Karl Kristian Krusep, Siumut, borgmester Ole Dorph qaffasinniartutut politikerinullu nikassaasutut nalilerpaa. Tamanna pivoq borgmesterip Inatsisartunut qineqqusaartunik inuussutissarsiutit pillugit ilisimasakinneraanerata kingorna. Ole Dorph paatsoorneqartutut misigisimavoq
Qaasuitsup Kommuniani borgmesteri, Ole Dorph, Siumut, Inatsisartunut Avannaani qineqqusaarnerup nalaani, qinigassanngortittut inuussutissarsiornermik ilisimasakinnerarlugit uparuaavoq. Borgmesteri isumaqarpoq, qinigassanngortittut amerlavallaartut Avannaani inuussutissarsiornerup siuarsarneqarnissaa anguniarlugu qinikkatut sulinissaminnut piukkunnaateqanngitsut amerlavallaartut, minnerunngitsumillu Qaasuitsup Kommuniani suliffissaaleqisut 1.100-t missaanniittut qanoq ilillugit sulilersinneqarsinnaanissaat qulakkeerniarlugu, siunnersuutinik tigussaasunik piviusorsiortunillu saqqummiisoqannginnerarlugu uparuaavoq.
Taamatulli uparuaaneq Siumumi ilaasortaqataanit, Karl Kristian Krusemit, Niaqornani najugaqartumit, ilalernartinneqanngilluinnarpoq. Taanna Avannaani qineqqusaarnernut arlarlinnut peqataavoq, 2013-milu Inatsisartunut iserluni.
Karl Kristian Kruse, 1988-imiilli piniartutut aalisartutullu inuussutissarsiuteqartoq, isumaqarpoq, Ole Dorph, inuussutissarsiutinik ingerlataqarnerup iluani misilittagartuujusoq, allanit ilisimasaqarnerusutut politikerinillu allanik nikassaarpalaartutut pissusisilersortoq. Borgmesterip allanik sianiitsutut takorluuisinnaassutsimillu amigaateqartutut allanik nalileerpalaarnera tupinnartoqartippaa.
Allaaserineqartoq aviisi Tamanumi tamaat atuarneqarsinnaavoq. Qinersinissaq pillugu aviisimi allanik aamma atuagassaqarpoq. Aviisi ataani akeqanngitsumik aaneqarsinnaavoq: