Isornartorsiorneqartoq: Pensionisiaqalernissamut qinnuteqaammik suliarinninnermut ukiut tallimat sinnerlugit atorneqartut

Kommunip suliamik kigaatsumik suliarinninneranut tunngasumi ombudsmandi Vera Leth isornartorsiuivoq.

Qeqqata Kommuniani innuttaasoq siusinaartumik pensionisiaqarniarluni qinnuteqarmat, suliaq 2016-imi apriilimi aallartippoq.

Suliamik arlaleriarluni kinguarsaasoqareertoq innuttaasoq novembarimi 2020-mi kommunimit allagarsivoq, innuttaasoq utoqqalinersiaqalersinnaatitaalernissani sioqqullugu taamaallaat ulluni 22-ni siusinaartumik pensionisiaqarsinnaatitaassammat qinnuteqaat suliarineqarsimanngitsoq tassani allaqqavoq.

Innuttaasup tamanna ombudsmandimut naammagittaalliutigaa, innuttaasullu januaarimi 2021-mi naammagittaalliuteqarnerata kingorna kommunip suliaq aallarteqqippaa, innuttaasorlu 1. oktober 2021- mi aalajangiinermigut 1. september 2020-mit atuutilersumik siusinaartumik pensionisiaqalersillugu.

"Piffissaq suliarinninnermut atorneqartoq suliarinninnerlu akuersaagassaanngitsut"

Innuttaasup siusinaartumik pensionisiaqalernissamut qinnuteqaataa kommunip naammassillugu suliarinagu, taarsiullugulu suliap ingerlateqqinneqannginnissaanik allagaqarnera, ombudsmandip isornartoqartippaa.

Kommunip aqutsisoqarfiata piginnaatitaanini pisinnaatitaaninilu avaqqullugit iliuuseqarsimanera Ombudsmandip ajuusaarnartutut aammattaaq isigaa, innuttaasup qinnuteqaataa Atugarissaarnermut Ataatsimiititaliamut suliassanngortinneqannginnera pissutigalugu.

- Ombudsmandip ataatsimut isiginnilluni paasinninnera unaavoq suliami matumani piffissaq suliarinninnermut atorneqartoq suliamillu suliarinninneq akuerineqarsinnaanngitsut pineqartut, ombudmandi suliaq pillugu allappoq, nangillunilu:

Kommuni: Pitsanngoriartitsisoqarpoq

- Suliap piffissani pingasuni tulleriinneri malillugit qaammatini 27-ni, qaammatini qulini aamma qaammatini arfineq marlunni iliuuseqarfigineqarani uninngatinneqartarsimanera kiisalu suliap ataatsimut isigalugu ukiut tallimat sinnerlugit suliarineqarsimanera Ombudsmandip pingaartillugu isiginiarpaa.

Qeqqata Kommunia suliamut atatillugu ombudsmandimut oqaatigaa 'sulianik siusinaartumik pensionisianut tunngasunik suliarinnittarnermi periaaseq annertuutigut allannguuteqartitsiviusimasoq.'

Ombudmandip suliap ingerlanera pillugu nassuiaataanik eqikkaaneq:

• A (innuttaasoq) siusinaartumik pensionisiaqalerumalluni Qeqqata Kommunianut 19. april 2016- imi qinnuteqaateqarpoq.
• Nakorsap uppernarsaasiussaa A-p siusinaartumik pensionisiaqalerumalluni qinnuteqaataanik suliarinninnermi atugassaq 23. maj 2016-imi suliarineqarpoq. Kommunip qinnuteqaat nakorsallu uppernarsaasiussaa ingerlateqqillugit Majoriamut suliarisassanngorlugit nassiussimanngilai.
• Sulisinnaassuseqarneq pillugu takussutissiaq 20. august 2018-imi suliarineqarpoq, nakorsallu uppernarsaasiussaa nutaaq 8. oktober 2018-imi suliarineqarluni. Suliaq tamatuma kingornatigut suliamik suliarinninnermi iliuuseqarfigineqarani qaammatit qulit missaanni uninngaqqissimavoq.
• A siusinaartumik pensionisiaqalerumalluni 19. august 2019-imi qinnuteqaateqaqqippoq, Majoriallu iliuusissanut pilersaarut 10. september 2019-imi suliaraa.
• Majoriap kommunimi ilaqutariinnut immikkoortortaqarfimmut oqaaseqaataanit 8. juni 2020-meersumit erserpoq siusinaartumik pensionisiaqalerumalluni qinnuteqaat tunuartinneqarsimasoq. Oqaaseqaammi tassani A-p ukioqqortusisimanera nakorsallu uppernarsaasiussaa 2016-imeersoq innersuussutigineqarput