Isornartorsiorneqareernermi kingorna: Urani pillugu oqaatsini Olsvigip allannngortinnianngila

Siumut tunuliaqutaralugu Inatsisartunut qinigassanngortittut pingasut, Greenland Minerals and Energyp pisortaanera John Mair kiisalu Sulisitsisut Peqatigiiffiata pisortaata Brian Buus Pedersenip Inuit Ataqatigiit siulittaasuat Sara Olsvig isornartorsiorpaat.

Politiken.dk-mi allaaserineqartoq eqqartorneqarpoq, taanna arfininngormat saqqummerpoq.

Allaaserineqarpoq Inuit Ataqatigiit 'uranimut innuttaasunik taasititsisoqaraluarpalluunniit Kuannersuarni pilersaarutigineqartoq IA-mit unitsinneqassasoq' oqaatigimmagu.

Ingasaallugu paasineqartut
- Sara Olsvig, oqaatsitit malillugit Kalaallit Nunaanni aatsitassarsiornermik politikkianik nalornilersitsisimasutut assigiinngitsunit nalinerneqarputit. Innuttaasut taasitinneqarneranni angertoqassagaluarpat taasititsinerup inernera ataqqineqassanersoq ersarinngitsumik akivat. Tamanna pillugu Siumumit aamma SIK-mit isornartorsiutigineqarpoq. Isornartorsiuisoqarnera qanoq oqaaseqarfigisinnaaviuk?

- GA-mit oqaaserineqartoq isumaqatiginngilara. Allaaserineqartup saqqummereernerata kingorna nassuiaanikka GA-mit ingasaallugu paasineqarpoq. Inuiaqatigiit toqqissisimanerulernissaat anguniarlugu taasisoqarnissaa kissaatigaarput. Innuttaasut aatsaat tusaaneqarsinnaassappata taasisoqarumaartoq oqaatigisareerpara, Sara Olsvig oqarpoq.

Oqaatsini attatiinnarpai
- Aatsitassarsiorneq pillugu ersarinngitsumik oqaaseqarnerit aningaasaliinianut kiisalu aatsitassarsiorfinnut aqutsisunut annilaarnartuusoq GA-mit oqaatigineqarpoq. Taama oqartoqarnera paasisinnaaviuk?

- Aningaasaliiniartut akornanni ernumanartoqartareerpoq. Politikenip allataa pissutaalluni ernumalertoqanngilaq. Patajaatsumik ingerlatsisoqannginnera, royaltiesit pissutaallutik, uuliasiortut misissuinissaannut tapersersuinngippallaarnerit, uuliasiornermi kiisalu aatsitassarsiorniarnermilu innuttaasunik peqataatitsinnginerit kiisalu uranimut akuersaanngilluinnarnermut allanngortitsinermut pissutsit atorneqartut pissutaallutik ernumasoqarpoq. Innuttaasut, suliniaqatigiiffiit kiisalu aallartitsiniartut ataatsimut oqaloqatigiittoqartariaqarpoq.

- Politikenimut oqaatsitit peqqissimissutigaagit?

- Naamik! IA partiini kisiartaavoq isummaminik attassiinnartoq. Innuttaasut peqataatinneqarnerunissaanik oqarneq nuannariinnarlugu oqarnerunngilaq. Innuttaasut isumaat paasiniarlugit taasititsisoqarnissaa piumasaraarput. Politikenimut oqaatsikka, uanilu apersorneqarninnut isuma annitara assigiipput, Sara Olsvig oqarpoq.