Skip to main content

Isorineqaraluarluni: Telemi pisortaq Savalimmiuni angusarissaartitsisoq

Ukiuni kingullerni Føroya Telemi pisortatut Kristian Davidsen, suliffeqarfimmi millionilikkaanik sinneqartoortartumi siuttuuvoq

Tele-Postip pisortaanera, Kristian Reinert Davidsen, piffissami kingullermi Per Rosing-Petersenimit Partii Naleqqameersumit pasillerneqarpoq: Savalimmiuni suliffeqarfimmi taanna amigartoortitserujussuarnikuuvoq.

Per Rosing-Petersenip isornartorsiuinerminut itisiliillunilu uppernarsaanissaanik Sermitsiaq.AG-p saaffiginnissutaa qisuariarfigineqanngilaq. Kisianni pasilliinerit Føroya Telemi 2009-imi 32,1 millionit koruuninik amigartoornermut tunnganasorineqarput, tassani Kristian Reinert Davidsen pisortaanerugallarmat. Tassani 2006-imit 2015-imut pisortaavoq.

Amigartoornerup kingorna ersarippoq, suliffeqarfiup ineriartorneq mumisissimagaa. Føroya Telelu ukiuni tulliuttuni aatsaat taama sinneqartooruteqartigisarpoq.

Angusaq pitsaanerpaaq
2012-imi akileraareernermi 33 millionit koruuninik sinneqartooruteqarpoq, ukiullu tulliani 56 millionit koruuninik, 2014-imilu 58,4 millionit koruuninik sinneqartoorpoq. Føroya Telep tamanna angusaasa pitsaanerpaartarigallarpaa.

Ukiunilu taakkunani taakkartorneqartuni Savalimmiut naalakkersuisui 30 millionit koruunit missaanni aktianit pissarsisarput.

2015-imi ukiumut naatsorsuutit inerneraat, 29,8 millionit koruuninik sinneqartoorneq.

It-mut aningaasaliineq ajutoortoq
Per Rosing-Petersenip pasilliutigisaa, Føroya Telep kukkusumik it-mik ingerlatseqatigiiffimmut Norriqimut tunngavoq.

Kringvarp Føroya naapertorlugu (Savalimmiuni nutaarsiassaqartitsivik) Føroya Telep Norriqip 40 procentiata missaa pigisimavaa. Savalimmiormiullu aningaasaliisartut arlallit aamma suliffimmut aningaasaliipput, ingerlanerlunneranilu annaasaqaataarujussuarpoq.

Føroya Tele suliffeqarfimmi tunuannginnermini 80 millionit koruuninik annaasaqarpoq.

Atuaruk: Telemi pisortaq amigartoortitsinermut pasilliutigineqarnini taamaateqquaa

Kaaviiaartitat amerlanerusut
Føroya Tele 2007-imi Norriqimut piginneqataalerpoq, ukiumullu nalunaarummi naatsorsuutini siulersuisuni siulittaasuusimasoq Heini Zachariassen allappoq, Føroya Telemi kaaviiaartitat ukiuni tallimani tulliuttuni annertusineqarnissaanut Norriqimik pisinerup anguniagaasa ilagigaat.

Taanna anguniagaq siulersuisut aamma aqutsisut isumaqatigiissutigigaat tassani atuarneqarsinnaavoq.

Tassanilu aamma allaqqavoq, Norriqip danskit, tyskit aamma tuluit suliffeqarfii pisiarinissaanut pilersaaruteqartoq.

Suliniutit qimakkaat
Norriq kisianni amigartoorujussuarpoq, suliffeqarfillu 2012-imi tunineqarpoq, ilaatigut Savalimmiormiut piseqataapput.

Ukiuni sisamani amigartoorutit 143 millionit koruuniupput, ingerlatseqatigiiffiullu katillugit 200 millionit koruunit annaasimavai.

Kristian Davidsen 10. oktober 2012-imi aningaasaliinermit suna ilikkarneqarsimanersoq Kringvarp Føroyami aperineqarami, Føroya Telemi suliniutinit pingaarnerit qimappallaarneqarsimasut oqarpoq.

- Qanoq iliussanerluni iliussannginnerlunilu angusassamik toraagalimmik iliuusissamik peqarnissaq pingaaruteqarpoq. Suliniutit pingaarnerit, tassa tele, pikkoriffigalugit ukkatarinissaat. Tamanna ukkatarissavarput, Kristian Reinert Davidsen 2012-imi oqarpoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER