Island: Kalaallit Nunaannut attaveqarneq imatut nukittorsarneqarsinnaavoq
Islandimi suleqatigiissitat nalunaarusiaq 272-inik quppernilik saqqummiussimavaat, tassani Islandip Kalaallit Nunaannut attaveqartarnini qanoq nukittorsarsinnaaneraa allaaserineqarsimavoq.
Islandimit Kalaallit Nunaannut attaveqartarnerup nukittorsarneqarnissaa ukkatarineqarsimavoq, tassungalu atatillugu nunanut allanut ministeriusimasoq Össur Skarphedinsson 2019-imi Kalaallit Nunaannut tunngatillugu ataatsimiititaliami aqutsisunngortinneqarsimalluni, ataatsimiititaliaq nunat taakku marluk suleqatigiinnerisa qanoq nukittorsarneqarsinnaaneranut inassuteqaatinik saqqummiussisussaavoq.
Kalaallit Nunaannut tunngatillugu ataatsimititaliap nalunaarusiaq decembarip qaammataani naammassisimavaa, tassani Islandimini inatsisartunut inassuteqaatit 99-it saqqummiunneqarput. Inassuteqaatit niuernermut, peqqissutsimut, aalisarnermut, attaveqaatinut, aatsitassanut, nukissiornermut, takornariaqarnermut Issittumullu atatillugu sammisassanut tunngassuteqarput.
Tunu immikkut sammillugu
Kalaallit Nunaannut tunngatillugu ataatsimiititaliap Tunu immikkut illuinnartumik sammisimavaa, taannami naalagaaffiup qeqertaasup qaninnerpaatut sanilerivaa ukiorpassuarnilu immikkut illuinnartumik atassuteqarfigisarsimallugu.
Nunanut allanut Naalakkersuisup Steen Lyngep suliniutigineqartoq nalunaarusiamilu inassuteqaatigineqartut pissanganarnerarlugillu soqutiginarnerarpai.
- Islandimi Ministereqatiga Gudlaugur T. Tórdarson peqatigalugu video atorlugu ataatsimeeqatigeeqqammerpugut, tassanilu tunngavigineqartoq nalunaarusiarlu saqqummiuppai nalunaarusiamilu saqqummiunneqartut siunertat inassutillu pitsaasut amerlaqisut pillugit suliaqarnissaq timitaliinissarlu neriuutigilluaqaara, Steen Lynge oqarpoq.
Nalunaarusiaq inassuteqaaterpassuarnik imartuujusoq Namminersorlutik Oqartussanit maanna atuqqissaarneqassaaq, aamma Islandip Kalaallillu Nunaata oqaloqatigiittarnissaannut tunngaviussaaq.
Islandimit aalajangerneqassasoq
Islandimi tusagassiorfiit naapertorlugit Islandimi nunanut allanut misinisterip Guðlaugur Þórip oqaatigisimavaa, nalunaarusiaq nunat taakku marluk suleqatigiinnerannut allannguisussatut isigalugu.
- Annertuumik suliaqartoqarsimavoq, attaveqatigiittarnerulli sunniuteqarluartumik qanoq nukittorsarneqarsinnaaneranut pilersaarut suli amigaataavoq, ministeri nalunaarusiaq "imartooq" tunniunneqarsimasoq maluginiarsimallugu oqarpoq.
Islandimi politikkerit attaveqatigiittarneq nukittorsarniarlugu siullertut qanoq iliuuseqarniarnersut suli nalunarpoq. Steen Lyngep tusagassiorfinnut nalunaaruteqarnermini oqaatigaa, Islandimi nunanut allanut ministerip taassumalu naalakkersuisoqarfiata saalajangissagaat, sunik ukkataqartoqarlunilu inassuteqaatit sorliit ingerlanneqassanersut.
Nalunaarusiaq Islandimiusumiit tuluttut nutserneqarsimavoq, nalunaarusiarlu atuarneqarsinnaavoq linki una aqqutigalugu: ”Grønland og Island i et nyt Arktis”