Islandip ministeriunera pisortatigoortumik tikeraassaaq
Katrín Jakobsdóttir Nuummiissaaq sapaatip akunnerani matumani.
Islandip ministeriunera Katrín Jakobsdóttir ataasinngornermit pingasunngorneq ilanngullugu pisortatigoortumik tikeraassaaq.
Naalakkersuisut siulitaasuat Múte Bourup Egede (IA) ilaatigut ataatsimeeqatigissavaa, Namminersorlutik Oqartussat tusagassiutinut nalunaarummi allapput.
- Islandip ministeriunera tikeraarnermini Ilisimatusarfimmut pulaassaaq tassanilu ilinniartut arnallu aggersarneqarsimasut oqalliseqatigissallugit. Ataatsimiinnermi suiaassutsit naligiissitaanerlu sammineqassapput. Islandip ministeriunera Katrín Jakobsdóttir nammineq ilisaritilluni aallarniissaaq tamatumalu kingorna Aningaasaqarnermut Naligiissitaanermullu Naalakkersuisoq Naja Nathanielsenilu peqataasut oqalliseqatigissallugit, nalunaarutigineqarpoq.
Tamatuma saniatigut Islandimiut aallartitaasa Silap Pissusaanik Ilisimatusarfik, Nunatta Katersugaasivia Allagaateqarfialu pulaassavaat Inatsisartunullu pulaarnissaminnut aamma periarfissaqassallutik.
Katrín Jakobsdóttir Islandimi 2017-mi ministeriuninngorpoq.