Annullering
Islandip EU-mut qinnuteqaatini tunuartippaa
Qeqertap naalagaaffiup EU-mut ilaasortanngorniarnissaminik pilersaarunni taamaatiinnarpaa. Isumaqatigiinniarnerit septembarimili unitsinneqarsimapput
Islandip EU-mi ilaasortanngornissaminut pilersaarunni taamaatiinnarpaa, ilaasortanngornissaminillu qinnuteqaanni tunuartinniarlugu, taamatut allappoq nutaarsiassaqartitsivik AFP.
Partiit naalakkersuisoqatigiit marluk talerperliit Fremskridtspartiet aamma Selvstændighedspartiet isumaqatigiipput qinnuteqaat taamaatiinnarneqassasoq.
Taamatut aalajangernissaq ilimagineqareersimavoq, EU-mut ilaasortanngornissamik isumaqatigiinniarnerit naalakkersuisut septembarimi unitsimmatigit.
Naalakkersuisulli neriorsuisimagaluarput islandimi innuttaasut aalajangissagaat naalagaaffik nunani avannarlerniittoq EU-mut ilaasortanngussanersoq.
Isumasiuinerit naapertorlugit islandimiut amerlanerussuteqartut EU-mut akerliupput, taamaattumik innuttaasunik taasisitsisoqassappat naalakkersuisut aalajangernerat allanngortinneqarunanngilaq.
Fremskridtspartiet aamma Selvstændighedspartiet siorna Islandimi qinersinermi ajugaapput. Islandillu naalakkersuisortaavi aalajangerput EU tununniarlugu.
Tamanna naalakkersuisuusimasut socialdemokratit grønne-llu anguniagaannut akerliulluinnarpoq, taakkua 2008-mi aningaasarsornikkut ajornartorsiornerup kingorna EU-mut ilaasortanngornissaq sulissutigilermassuk. Fremskridtspartiet aamma Selvstændighedspartiet taamanikkut partiit naalakkersuisuullutik Islandimi 2008-mi aningaaseriviit islandillu aningaasaqarnerata ajalusoorluinnarnerannut pisooqataalluinnarput.
Nunani tamalaani tupigusuutigineqarsimavoq Socialdemokraterne aamma De Grønne qinersisartunit pillarneqarsimammata, Islandip aningaasaqarnikkut ajalusoorluinnarneranit aningaasarsiornera ilorraap tungaanut aallartissimagaluaraat.
Naalakkersuisuusimasut aappalaartut-qorsuit 2009-mi EU-mut ilaasortanngorniarlutik qinnuteqarput, tamanalu kingorna Bruxlles arlalissuariarluni isumaqatigiinniarfigineqartarsimavoq.