Islandimut aqqut matoqqaannarallassaaq
Kalaallit Nunaanniit Islandimut silaannakkut aqqut ammarnissaanik suli eqqarsaateqartoqanngilaq. Anguniagaq pingaarneq tassaavoq tunillaassuunnerup nunatsinnit ingalassimatinnissaa, corona pillugu sulisoqatigiit ilisimatitsipput.
Kalaallit Nunaanniit angalasut killilersuiffigineqannginnissaat Islandimiut oqartussaasuisa sapaatip akunnerata siuliani aalajangerpaat. Nunatsinniilli Islandimut silaannakkut aqqut ammarnialersaarneqanngilaq.
Corona pillugu sulisoqatigiit Sermitsiaq.ag-mut ilisimatitsipput.
Tamassumunnga tunngavilersuutigineqarpoq Covid-19-imut akiuussutissamik kapuinerup ingerlanneqarnerani nunatsinni tunillaassuuttoqalinnginnissaa anguniarneqarmat. Hans-Peder Barlach Christensen ilisimatitsivoq. Taanna Naalakkersuisut siulittaasoqarfianni pisortatut inissisimanini tunngavigalugu corona pillugu sulisoqatigiinni pisortaavoq.
Island immikkut aalajangiussaqarpoq
Islandimi oqartussat sapaatip akunnerata siuliani ilisimatitsipput Kalaallit Nunaannit toqqaannartumik Islandiliartut immikkut aalajangiiffigineqarsimasut. Tamanna isumaqarpoq nunatsinnit toqqaannartumik Islandimut tikittut aallannginnerminni coronavirusimut misissortissimasariaqanngitsut, Islandimi ulluni tallimani mattusimasariaqanngitsut kiisalu tikinnermit ullut tallimassaanni misissorteqqaartariaqanngitsut.
Piffissaanngilarli angallaffinnik ammaanissamut, Hans-Peder Barlach Christensen ilisimatitsivoq.
Tunillaassortoqalernissaanut aarlerinaat annertuvoq
Nunatsinni coronavirusimik tunillatsissimasoqanngilaq sapaatit akunnerni arlalinngulersuni. Tunillaassuunnerlu nunatsinnit ingalassimatinnissaannut, coronavirusimullu akiuussutissamik kapuinerup ingerlatiinnarnissaanut periarfissatuaavoq nunap matoqqatinnissaa, oqartussallu akuerisaannik kisimi angalatitsineq. Nunatsinnut aqqut akuerineqarsimasoq kisimiuvoq Københavnimiit Kangerlussuarmut silaannakkut aqqut, tikittullu corona pillugu sulisoqatigiinnit immikkut ittumik akuerineqarsimasarlutik.
- Innuttaasunut akiuussutissamik kapuinerit ingerlanneqarput. Kisianni aamma ilisimanngisaqarpugut, tassa akiuussutissaq coronavirusinut allanngoriartortunut qanoq qisuariartarnersoq, sunniuteqsassanersoq. Nalunarallarpoq qaqugu ammariartorumaalissanersugut, Hans-Peder Barlach Christensen ilisimatitsivoq.
Islandimi tunillatsissimasut maanna amerlanngikkaluartut taamaattoq tunillatsissimasut tassanngaannartumik amerleriataarsinnaapput. Nunatsinnullu aqqut ammassappat tamanna aarlerinaateqarpallaartoq, corona pillugu sulisoqatigiit ilisimatitsipput.
Islandimut silaannakkut aqqut november 2020-mi matuneqarallarpoq.