takornariaqarneq

Islandimiut takornariat anigaasanik aallerfigineqassapput

Air Greenlandip ilaasartutik amerliartortikkumaannarumallugit Islandi immikkut sammilerpaat.

Ilulissat takornarissanik ornigarneqarluartarpoq. Illoqarfimmilu akunnittarfiit unammilligassaqarput. Tamannalu aaqqiissuteqarfigineqarusuppoq Nuummi unnuisitsisalernikkut.

Islandimiut takornariaqarnikkut isertitsissutaanissaat anguniarlugu Air Greenlandip Keflavikkimut angalanerit amerlisarpai.

Aasaanerani iluatitsineq

Ukioq kingulleq Air Greenlandi Ilulissaniik Keflavikkimut aasaanerani silaannakkut aqqummik pilersitsivoq, ukiorlu manna suli allanik aamma suliniuteqassaaq.

2017-mi Keflavikimiit Nuummut timmisartuussinerit martsip 22-anniit annertusiartortinneqalissapput, Air Greenland tusagassiuutinut nalunaaruteqarpoq.

Aasaaneranilu angallannerpaaffiup nalaani Air Greenlandi Islandip Kalaallit Nunaatalu illoqarfiisa pingaarnerit akornanni sap.ak. pingasoriarluni timmisartuussisassaaq. Tamatumalu kingorna timmisartuussisarneq ukiarumiit ukioq kaajallallugu aalajangersimasumik atuutilissaaq.

Air Greenlandip periusissiaanut ilaavoq takornariaqarnerup tungaatigut annertusaanermi suleqataanissaq, tassanilu takornariaqarnermik ingerlatsinerup tamakkiisup annertusiartornera malunnarpoq. Akunnittarfiillu Ilulissani Kujataanilu unammilligassaqarput, aaqqiissuutissaqarporli.

Ornigarneqarusuttoq

Ilulissat tassaavoq takornarianit ornikkumaneqarnerpaaq, sulili ineriartorsinnaanerugaluaq illoqarfimmi akunnittarfiit amerlassusaannit killilerneqarpoq. Nuummili unnuisarfiit aasaanerani atorneqannginnerpaasarput. Taamaattumik Nuuk Ilulissallu aqqusaarlugit takornariarnissamut periarfissamik pilersitsivugut, tassa takornarissat Ilulissanut ullaakkut tikikkunik unnukkut aallaqqittartussanngorlugit. Ilulissanut takornarissat amerlinerinik nassataqassaaq, akunnittarfinnilli artukkiinani, Air Greenlandip niuernikkut pisortaa, Maliina Abelsen paasissutissiivoq.

Islandimiut Kalaallit Nunaannut angalasartut amerliartornerat pissutigalugu, ukioq manna aasaanerani ilaasut, amerlanerit Islandikkoortut, 4%-nik amerleriarnissaat anguniarneqarpoq.

2016-mi rekordi

Air Greenlandip siorna juulimi 21.000-nik angallassivoq – aatsaallu taamak amerlatigisunik – angallannerpaaffiullu avataani aamma qaffariartoqarmat, 2016 ukiuuvoq oqaluttuarisaanitsinnut ilannguttoq.

Powered by Labrador CMS