Arsaalluni EM
Islandimiut storskærmikkut takutissavaat
Sapaatiuppat Frankrigip Islandillu EM-imi kvartfinalernerat akunnittarfimmi storskærmikkut takutinneqassaaq
Islandip arsaalluni nunanut allanut unammisartui, EM-imi tupaallatsitseqisut, europami pissartanngorniunnermi kvartfinalimi unammilerunik ajornartorsiussaqaat.
Tassami Islandip sapaatiuppat unamminermi aalajangiisuusumi nuna pissartanngorniuffiusoq Frankrig unammissavaa.
Unamminerlu Nuummi Hotel Hans Egedemi storskærmimi isiginnaarneqarsinnaavoq, tamatuminngalu aaqqissuussisuuvoq illoqarfiit pingaarnersaanni islandimiut peqatigiiffiat.
Soqutigineqarluarpoq
Manna tikillugu inuit 60-it peqataaniarlutik nalunaarsimapput, allallu 57-it soqutiginnipput.
– Naatsorsuutigisariaqarpoq inuit 100 aamma 150 akornanni amerlassusillit unamminermik isiginnaaqatigiissasuti, amerlasuut Islandimeersut Savalimmiuneersullu, aammattaarli qallunaat, kalaallit franskillu, peqatigiiffiup siulittaasua Birkir Rutsson tusagassiorfinnut nalunaarummi allappoq.
Aaqqissuussisut kikkut tamaasa unamminermik isiginnaariarnissaannut tikilluaqquvaat, unamminerlu nunatta nalunaaqutaa malillugu nalunaaqutaq 17.00 aallartissaaq.