Islandimiut paasisimasallit Tunngaviusumik Inatsisissamut ataatsimiititaliaq siunnersorpaa

Tunngaviusumik inatsisissamut ataatsimiititaliami siulittaasoq Vivian Motzfeldt siuttoralugu aggustip qulingiluaat ilanngullu Islandimut siunnersortikkiarlortutik tikeraarput, Islandi Danmarkimut aamma atanikuuvoq.

- Præsident Gudni Th. Johannessonip naapinnera assorsuaq pissarsiaqarfigivarput. Nunatta maanna alloriarnera soqutigalugu malinnaaffigigaa nuannerpoq paasillugu. Ataatsimooruteqarnerput malunnartorujussuuvoq. Ataasiarani oqarfigivaatigut nunatut sanileriissuunerput inuiattullu ikinngutigiinnerput suli inerisartuartariaqarivut. Kissaatigaa Islandip nunattalu suleqatigiinnerat suli nukittorsarneqassasoq, soorlu Nunat Killiit Siunnersuisooqatigiit aqqutigalugit, Vivian Motzfeldt tusagassiuutinut nalunaarummi oqarpoq.

Præsidentip siunnersuutaasa ilagaat nunatsinni ilinniartitaanerup ilisimatusarnerullu qaffassarneqartuarnissaat. Tamatuma saniatigut inuussutissarsiornikkut siuarsaanermi nunatta Islandillu suleqatigiinnerunissaat kaammattuutigaa.

Allassimaannanngitsoq

Tunngaviusumik inatsisissaq tassaaginnalerumaassanngitsoq suna allassimaannartoq, præsidenti erseqqissaavoq

- Paasinninnerput malillugu præsidentip kalaallinut tamanut oqariartuutaa unaavoq apeqqutaanerpaarpaasoq kalaallit imminut tatigisuunissaat, anguniakkaminnik ilumut iluatsitsisinnaanerminnik upperinninnissaat, tusagassiuutinut nalunaarummi erserpoq.

Vivian Motzfeldtip oqaatigaa nuannaarutigalugu kalaallit tunngaviusumik inatsisissaannik suliaqarnitsinni Islandermiunik immikkut paasisimasalinnik isumalluuteqarsinnaanerput præsidentip ammatimmagu.