Islandimiut Kulusumut tunissuteqarlualerput
Aningaasat 400.000 koruunit nipilersuuterpassuillu Islandimiut katersorsimavaat Kulusumi illup nipilersortarfiup apriilip aallartilaarnerani ikuallannerani annaasanut taartissatut
Kulusumi meeqqat inuusuttuaqqallu nipilersortarfeqaqqilernissaat nipilersuutissaqarnissaallut Islandimiut assut ikiuuffigerusussimavaat. Islandimiut inuppaat Kulusumukalerput tunissutissanik tunniukkiartorlugit.
Borgmester Asii Chemnitz Narup aamma Kulusuliarniarpoq tunissutit tigujartorlugit. Reykyavikimi byrådimi ilaasortat marluk, nipilersortarfiup Harpa Concert Hallip pisortaa aamma kalaallit islandimiullu peqatigiiffianit Kalammeersut tunissutissanik apuussiartorniarput.
Air Icelandip aningaasaliiffigaa Islandimiit inuit 30-it Kulusuliarnissaat taakkulu aqagu tikissapput.
Tusaamasat
- Islandimit aallartitarpassuit naapinnissaanut qilanaarpunga, tassuunakkummi Kommuneqarfik Sermersuup Islandillu akornanni attaveqatigiinneq nukittorsarneqassaaq. Kulusummut tunissuteqartoqarneratigut nipilersortarfimmik sanaqqittoqarsinnaanngussaaq, tamannalu susassareqatigiinnermut ersiutaalluinnartuuvoq, tamannalu attortinnartuullunilu isumassarsinartuuvoq. Islandimiut Tunumiullu qanittumik attaveqarnerat inuinnaat akornanni nukittuneranik takussutissaavoq, borgmesteri Asii Chemnitz Narup oqarpoq.
Katersuiniarluni Reykyavikimi tusarnaartitsinermi Islandimiut nipilersortartut nuimasut arlallit peqataapput aammattaarlu nipilersuutinik tunissuteqarlutik.
Nunafonden aamma nipilersortarfeqaleqqinnissaa siunertaralugu tunissuteqarniarluni nalunaareerpoq
Kulusumi illu nipilersortarfik meeqqanit inuusuttuaqqanillu atorneqarluartartoq apriili aallartilaartoq nungulluni ikuallappoq tasanilu aamma nipilersuutit tamarmik ikuallagussaapput.