aatsitassat
Islandimiut Kujataani kuultisiulersut
Islandimiut ingerlatseqatigiiffiata nutaap Nanortallip eqqaani Napasorsuup Qooruata eqqaani kuultisiorfiusimasumi saffiugassamik kuultiusumik tunisassioqqilernissaq neriuutigaa.
Nalunami kuultisiorfiusimasoq suli oqaluttuarisaannanngunngilaq, naak 2013-imi matugaluarluni ukiuni arfineq pingasunit amerlanerulaartuni kuulti 10 tonsingajak tunisassiarineqaraluartoq. Suli kuultimik annertuumik aallertoqarsinnaasoq Islandimiut aatsitassarsiornermik ingerlatseqatigiiffiat ARC isumaqarpoq, aasarlu manna kuultisiulernissartik aallartinniarlugu.
Aviisi AG taama allaaserisaqarpoq.
Ingerlatseqatigiiffik nutaaq pilersinneqartoq
Ingerlatseqatigiiffiup ujaasinermi angusaagallartut tutsuiginartutut isigai, taamaattumillu nutaamik børsenimi allattugaasumik ingerlatseqatigiiffiliorput Alopex Gold Inc. kuultumik piiaanermik suliaqartussamik, neriuutigineqarporlu ukiut sisamat qaangiuppata tamakkiisumik tunisassiulersimassallutik.
- Alopex Gold Inc.-imi pingaarnertut piginneqataasut Nalunaq A/S-imik piginnittut assigaat, taannalu aamma aningaasassarsiornermi peqataassaaq, Alopex Gold Inc-imit Joan Plant oqaluttuarpoq, oqaatigaalu ingerlatseqatigiiffik aggustip qiteqqunnerani sulisussanik arlalinnik kujataanut tikisitsissasoq.
Atortulersuutit misissorneqassapput
Tassani qaammatip aappaata affaani arlalinnik qillerissapput ujarassiornikkullu misissueqqillutik. Aamma immikkut ilisimasallit maannakkut atortulersuutinik misissuissapput qulakkeerniarlugu aqquserngit, ikaartarfiit allallu atortut atorneqarsinnaasut.
Allaaserisaq tamaat AG-mi saqqummertumi kingullermi atuaruk, taanna uani ataani linki atorlugu digitalimik iserfigisinnaavat: