Islandimiut EM-imut qilanaaqaat

Island marlunngorpat arsaalluni unammersuarnermi peqataarngaassaaq - EM-imi unamminermi Portugal Christiano Ronaldolu unammissagamikkit.

Arsaannermik tiguartittut

Tupaallannanngitsumik qeqertami qaqqanik innermik anitsisarfilimmiut arsaannermik tiguartissimapput. Taamatut oqaluttuarpoq Mette Kjuel Nielsen, Danmarkip Islandimi ambassadøria.

– Qularnanngilluinnarpoq maanimiut arsaannermik tiguartissimasut. Tamanna malunnarpoq arsaanneq oqaluuserineqaqalunilu allaaserineqartaqimmat. EM suli ullut tamaasa aviisit saqqaaniitinneqarneq ajorpoq, unammisartulli assingi sumi tamaani nivingapput, kikkullu tamarmik oqaluuseraat.

– Internettikkullu Parisimut timmisartornissaq neqeroorutigineqaqattaartuarpoq, ambassadøri oqarpoq.

30.000-it Frankrigiliarput

Nunami tusagassiorfiit naatsorsuutigaat islandimiut 30.000-t ukioq manna aasaanerani Frankrigimut feeriarniartut - tupinnanngitsumik juunip qiteqqunneranit sapaatip akunnerini marlussunni.

– Islandimiut billetsisiortorput pissutigalugu usorsisimaartuugamik, imaanngitsorli tamatigut ileqqorisartakkaminnit usorsisimaarnerulerlutik. Isumaqarput pissanganartorujussuusoq nuanneqalunilu, pissutigalugu tamanna aamma Daavip Goliathimut unammineranik oqaluttuatut ittuummat.

Isumalluartorujussuunngillat

– Imaanngilaq ajugaajuaannarnissaminnik isumalluartorujussuusut. Peqataanertik nuannaarutigerujussuaannarpaat.

– Amerlasuut isumaqarput tamanna ´inuunermi ataasiaannaq misigisassaasoq´, islandimiullu eqqarsarput arsaattarfimmi tamatumunnga peqataajumallutik, Mette Kjuel Nielsen oqarpoq.

Ingerlaqqissapput

Bookmakerit naatsorsuutigaat Island EM-gruppiminit, Portugalimik, Ungarnimik Østrigimillu peqataaffigineqartumit, ingerlaqqikkumaartoq, EM-gruppini arfinilinni gruppimi holdini angusarissaarnerpaatut imaluunniit normu 3-ngortut angusarissaarnerpaat sisamat ingerlaqqittussat ilattut.

Gruppi ajornannginnerusoq

Pappialamilumi gruppimit ingerlaqqinnissaq ajornanngippasinneruvoq, Islandip nunanut allanut unammisartuisa anngunniulluni gruppiminit, nunanit arsaannermi siuarsimasarnerpaat ilaannit Tjekkietimit, Tyrkiamit Hollandimillu peqataaffigineqartumit, anngunneranninngarnit.

Tamaviaarluartarput

Island anngunniunnermit ingerlaqqippoq arsariaaseqarlutik pisariunngitsumik, angusaqarfiuniartumik arsaattartulli tamavimmik tamiaviaarluartarnerat atorlugu. Vikingit piumassuseqarnerat - nammineq piginnaasanik upperinninneq - holdip iluaqitigilluarsimavaa. Taamatut oqarpoq Swanseami qeqqani arsaattartoq Gylfi Sigurdsson, taannalu Islandimi arsallaqqinnerpaatut isigineqarpoq.

– Sapinngitsugut upperiuaannarsimavara, klubbimi holdeqatimma ikinngummalu oqarfigisarsimagaluaraannga ´Islandimeersuuvutit, naalagaaffeeraq taama mikitigisoq pissartanngorniunnersuarmut anngutinngisaannartussaavoq´, taanna franskit tusagassiorfiannut L´Equipemut oqarpoq.

Unammilligassat

Islandimi silap pissusia pissutigalugu ukioq kaajallalugu arsaattarfinni issumik ujaraaqqanillu qallikkani arsaattoqarsinnaannginnerata saniatigut, Islandip ilanngullugu unammilligassarisimavaa arsaattartumi pitsaanerpaanut anngutsinniarnissaat. Ukiunili kingullerni qulini nuna angusarissaartalersimavoq.

Arsaattarfiit ivigaasanik qallikkat

Hal-ersuarnik ivigaasanik qallikkanik arsaattarfilinnik sanasoqarsimavoq, taamaasilluni arsaattartut piukkunnaateqarnerpaat ukioq kaajallallugu sungiusarsinnaalerlutik. Arsaattarfinnik atortorissaarluinnartunik pilersitsineq aamma inuit peqqissusaannik qaffatsitsisimavoq.

– Atortut tamakkua sananeqarnerat arsaatillaqqinnerpaanuinnaq iluaqutaasimanngilaq. Inuiaqatigiit tamaviisa kivissimavaat. Ilaatigut meeqqat amerlanerusut timersuutinik ingerlatsilersimapput.

Pujortartartut ikileriarput

– Ukiuni qulikkaani marlunni kingullerni takusinnaasimavarput timersorneq aallunneqarnerulersoq, tamannalu aamma inuusuttut imertartut pujortartartullu ikiliartornerannik kinguneqartoq, L´Equipe naapertorlugu Islandip ilinniagaqarnermut ministeria Illugi Gunnarsson oqarpoq.
/Ritzau/