Islandimiit Savalimmiuniillu tikittoqarsinnaanngorpoq
Islandimiut Savalimmiormiullu Kalaallit Nunaannut tikissinnaanngorput. Piumasaqaatituaavoq angalasut tikinnginnerminni sivikinnerpaamik ullut 14-it nunami najukkaminneeqqaarsimanissaat.
Islandimiutut innuttaassuseqartut savalimmiormiullu Kalaallit Nunaannut tikinnginnerminni covid-19-imut napparsimanerlutik misissorteqqaartariaqanngillat. Kalaallit Nunaannut tikinnermi angerlarsimaffimmi ulluni 14-ini mattusimaqqaarnissaq aamma piumasaqaataanngilaq, nunatsinnullu tikereernermi covid-19-imut misissortinnissaq piumasaqaataanani.
Namminersorlutik Oqartussat nalunaarut taama imaqartoq junip 15-ani 2020-mi atulersoq saqqummiuppaa.
Islandimi Savalimmiunilu najugaqartunit covid-19-imut misissortinnissamut mattusimagallarnissamullu maleruaqqusat atuutinnginnerannut pissutaavoq, nunani taakkunani covid-19-imik maanna napparsimasoqanngimmat.
Nunanit taakkunannga marlunnit angalasunut piumasaqaatit:
- Angalasoq Islandimi Savalimmiuniluunniit najugaqassaaq
- Angalasup nunani sivikinnerpaamik ulluni 14-ini qimassimassanngilaa
Angalaffissat aqagumiit
Air Greenlandip nittartagaani takuneqarsinnaavoq Islandimut aqagu pingasunngornermi 17. juni angalaniarluni billetisisoqarsinnaalereersoq. Nuup Reykjavikkillu akornanni maannamiit pingasunngornerit arfininngornerillu tamaasa aamma timmisartukkut aqquteqassaaq.
Naalakkersuisut siulittaasuata naalakkersuisoqarfianit ilisimatitsissutigineqarpoq assersuutigalugu Islandimit nunatsinnut angalasinnaasut killiligaanngitsut.
Tamanna isumaqarpoq nunatsinnut angalasussat sapaatip akunneranut 600-nissaannut killiliussami, ammariartuaarnermi immikkoortumi siullermi atuuttup saniatigut, Islandimit aamma Savalimmiunit angalasut ilanngunneqassanngitsut.