Skip to main content

Islandimi saqqummersitsineq Liss Stenderimut iluatsilluarpoq

Reykjavik-imi ´DesignMarch´ kalaallimut ilusilersuisartumut pitsaasumik misigisaqarfiuvoq

Reykjavikimi ukiumoortumik ilusilersuisartunik pisoqartitsinermi ´DesignMarch´-imi qanittukkut ingerlanneqarluni kalaaleq ilusilersuisartoq Liss Stender siullerpaamik nunami allamiutut peqataavoq. Saqqummersitsinermi islandimiut ilusilersugaat ilusilersuinermik nuannarisalinnut, tusagassiorfinnut nunarsuarmit tamarmeersunut nutaalianillu ujarlertartunut takutinneqarput.
– DesignMarch-imi aamma Epal-imi peqatanerput iluatsilluaqaaq, taamalu soqutigineqartiginerput tupaallaatigaarput. Halla Helgadottir, Reykjavik-imi DesignMarch-imi pisortap, oqaluttuuppaatigut Epal-imi Inuk Design ussanneqartut pingaarnersarisimagaat, islanimiullu ilusilersuisartut unammillerivut. Taamatut nersorneqarneq nuanneqaaq, maniguuttumillu tulluusimaarluta tiguarput, Liss Stender, Inuk Design-imeersoq, oqarpoq.
– Inuk Design nutaarluinnaavoq, uangalu ilusilersuisartutut uummatikkut eqqortittarpunga inuit ilusilersukkanik nuannarinnittut arlaatigut eqqorsimagaangatsigit. Inuit qisuariartarput tupaallallutik, qungujullutik eqqarsarpasillutillu - kingornalu tunisassiaq pisiarerusullugu. Tamanna nuanneqaaq.

Aalisagaannaanngitsut puisillu amiinnaanngitsut
– Inuk Design inuit takussallugit sungiusimasaannit allaanerujussuuvoq, aammami tupigusuppasittarput kalaallit kulturiannik uangalu tamatuminnga takutitseriaatsinnik oqaluttuukkaangakkit, Liss Stender oqaluttuarpoq.
Islandimi tusaamasanik najuuttoqarpoq, soorlu Calvin Klein aamma Google-p isumassarsiornermut pisortaa, illussanillu titartaasartoq Finlandimeersoq, tamarmillu oqalugiarput.
– Inuk Design soqutigineqartorujussuuvoq, tusagassiortunillu Islandimeersunik, Tuluit Nunaanneersunik, Tysklandimeersunik, Norgemeersunik Danmarkimeersunillu oqaloqatiginnippugut. Anguniagaraara Kalaallit Nunaata nunani tamalaani sammitilernissaa, Kalaallit Nunaat assigiinngitsutigut takutillugu, aalisagaannaanngitsunilu puisillu amiinnaanngitsunik il.il., takutinniarlugu nutaaliorneq - matumani ilusilersuineq - avammut takutissallugu Kalaallit Nunaannut taamatuttaaq pingaaruteqartigisoq, Liss Stender nassuiaavoq, taannalu aappaagu DesignMarch-imut qaaqqoqqinneqareersimavoq.
 

Velkommen til debatten
  • Oqallinneq malinnaaffigalugulu peqataaffigerusukkukku cookie akuerissavat.
  • Sermitsiaq.AG-p atuartartut akunnerminni isumaqatigiinngikkaluarpataluunniit kissaatigaa, pitsaasumik oqallittoqartarnissaa. Oqallinnissamut malittarisassavut unioqqutinneqarpata oqallinnermut peqataaqqusaajunnaartitsisoqarsinnaavoq.oq .
  • Peqqarniitsumik oqaaseqartoqarsimaneranik nalunaarutiginnittoqarsinnaavoq, "rapporter" toorlugu imaluunniit ”markere som spam” toorlugu”.

Forsiden lige nu

SENESTE NYHEDER