Skip to main content

Islandimi katersuiniartut 875.000-t anguaat

Tassaarsuarmit eqqugaasunut ikiuerusussuseq Islandimi annertuvoq

Islandimi nuna tamakkerlugu katersuiniarnermit ''Iliuuseqarnikkut ikinngutigiinneq''-mit nutaarsiassatsialaqarpoq.

Uummannap sulluani ajunaarnersuaqarnerata kingorna, Kalak, Kalaallit Nunaata Islandimi ikinngutigiittut peqatigiiffia, aamma skakklub Hrókurinn katersuiniarnermik aallartitsipput.

Katersuiniarnermut aallartitsisut ilaata, Kalaallit Nunaata ikinngutaata Hrafn Jökulssonip ullaaq nalunaaqutaq 09.45 oqaatigaa, katersukkat Islandip aningaasaanik 13,7 millionit anguneqarsimasut, tassa danskit koruuninngorlugit 875.000 koruunit.

Ullut pingasut ingerlanerinnaanni tamanna anguneqarpoq.

Islandimiut aningaasaataannik 16 millioninik katersuiniarnissaq, tassa danskit aningaasaataanut naatsorsorlugit 1 millionit anguniarneqartut, Hrafn Jökulsson Facebookimi quppernermini allappoq.

Katersorneqartut annikitsumik tunissuteqartorpassuarnit aamma ataasiakkaanik annertuumik tunissuteqartuneersuuppput. Ullumi suliffeqarfiit aamma kommunit katersuiniarnermiut tunissuteqarnissaat kajumissaatigineqarpoq.

- Reykjavikip innuttaasunut aallartitaqarfiat 225.000 koruuninik tunissuteqarpoq. Tapersersuilluartoqarpoq, kommunillu Reykjavik assigalugu iliuuseqarnissaat kajumissaarutigaarput, Hrafn Jökulsson oqarpoq.

Suliffeqarfinnit allanit tunissuteqartunit assersuutigisaqarpoq, kisianni Air Iceland Connect 64.000 koruuninik tunissuteqarluni suliffeqarfinni annertunerpaamik maannamut tunissuteqartuugallarpoq. Kattuffik ASI aamma 32.000 koruuninik ippassaq tunissuteqarpoq, Islandimilu maanna sulisitsisut kattuffiat ilaasortaminut tunissuteqartitsinissamik kajumissaarivoq.

- Katersorneqartut tamarmik eqqugaasut arlaatigut ikiorneqarnissaannut tutsinneqassapput. Nuna sanilerisarput ersoqatiginerata takutinnissaa pingaarnerpaatipparput.

Katersorneqartut 1 millionit angujumaarneraat ullup ingerlanerata takutikkumaarpaa, kisianni Islandermiut unammilligassamik naammassinnittartutut ilisimaneqarluarput.

Velkommen til debatten
  • Oqallinneq malinnaaffigalugulu peqataaffigerusukkukku cookie akuerissavat.
  • Sermitsiaq.AG-p atuartartut akunnerminni isumaqatigiinngikkaluarpataluunniit kissaatigaa, pitsaasumik oqallittoqartarnissaa. Oqallinnissamut malittarisassavut unioqqutinneqarpata oqallinnermut peqataaqqusaajunnaartitsisoqarsinnaavoq.oq .
  • Peqqarniitsumik oqaaseqartoqarsimaneranik nalunaarutiginnittoqarsinnaavoq, "rapporter" toorlugu imaluunniit ”markere som spam” toorlugu”.

Forsiden lige nu

SENESTE NYHEDER