Island tuniluuttoqarneranut akiuiniarluni aallartittoq
Islandimi coronap tuniluuteqqilernera pissutigalugu, oqartussat killilersuutinik unnuap-qeqqaniit atuutilersussanik atuutsitsisoqalissasoq aalajangersimapput.
Sapaatip akunnerata naanerani Covid-19-imik tunillatsissimasut nutaat 21-t paasineqarput, tamannalu Islandimi nappaatinik tunillaassortunik ilisimasallit pisortaata Þórólfur Guðnasonip ernummatiginerarsimavaa, oqartussanillu paasineqarmat Reykjavikip atuarfiani atuartut akornanni tuniluuttoqalersimasoq, tuniluuttoqarnera akiorniarlugu killilersuutissat arlallit ullumi saqqummiunneqarput.
Unnuap-qeqqaniit atuutilissasut
Unnuap-qeqqaniit imerniartarfiit, naluttarfiit, timigissartarfiit atuarfiillu matuneqassapput, pingasunngornermi Islandip nalunaaqutaa malillugu ullup-qeqqanut tusagassiortunik katersortitsinermi tamanna nalunaarutigineqartoq, Islandimi tusagassiiivik Iceland Review ilisimatitsivoq.
Aamma inuit 50-it katersuussinnaatitaanerat quliinnanngortinneqarput.
Killilersuutit sivikinnerpaamik sapaatip akunnerini pingasuni atuutissapput, premierministerillu Katrin Jakobsdóttirip neriuutigaa, sukatiterinerit tuniluuttoqarneranik annikilliliissasut.