Island Games: Sungiusangaatsiarnikuuvugut

26 graadit, anorsaalaaginnarlunim silaannaallu isugutannera 54 procentimiilluni.

Unamminerillu illup iluani ingerlanneqarlutik. Kalaallit Nunaata nerrivimmik arsaararluni nunanut allanut unammisartuisa unammilligassaat ikigisassaanngillat. Spaniammi kujataatungaani Gibraltarimi Island Games ulluni makkunani ingerlanneqaleruttorpoq.

- Isugutannerunnginnami kiannera ajunngilaq. Silap kianneranut sungiussereerpasippugut, unamminigullu kianneranit sunnerneqarpallaanngillat, Kaarliinannguaq Lundblad oqarpoq.

Bronzennattut

Kaarliinannguaq Lundblad kalaallit 20-t missaat peqatigalugit Island Gamesimut unammiarpoq. Qeqertat 13-it, taakkunannga Kalaallit Nunaat ilaalluni, tallimanngorneq juulip aqqaneq-aappaat ilanngullugu, unammisaqattaassapput.

Kaarliinannguup unamminnginnermini unamminissap qanoq ingerlanissaa takorloorniartarpaa. Taassuma saniatigut isumaqarpoq unammisussaatilluni takkutiaarnissaq pisariaqartoq.

- Ullunut ukununnga sungiusangaatsiarnikuuvugut. GM-ip kingorna paasinarsipajaarnikuuvoq kikkut unammiassanersut. Taamaammat sungiusangaatsiarpugut. Takuneqarsinnaanngilarluunniit immikkoorluta sungiusarsimasugut, tulluusimaarluni oqarpoq.

- Angusagut tulluusimaarutigeqaakka. Inuiaqatigiit ikittunnguugaluarluta qeqertat unammisagut arlallit ajugaaffigaagut. Unammillernarnerpaasimasoq tassaavoq Jersey, taakkununnga ajorsaqqalaarpugut, Kaarliinannguaq Lundblad oqaluttuarpoq.

Unamminerit suli arlallit

Kalaallit Nunaat timersuutini assigiinngitsuni arlalinni suli unammeqqittussaavoq. Kaarliinannguaq Lundbladilu isumaqarpoq unamminerit ilaat kalaallit ajugaaffigisinnaagaat.

Unamminerit kingorna angerlamut angalaneq tullinnguutissaaq, Kalaallit Nunaannullu tikittussat siulliit sapaatiuppat tikissapput.

- Tikereerutta ullut siulliit qiulilaarnissarput ilimanarpoq, illarluni oqarpoq.