Island Games: Nunarput sinnerlugu aajuku arpattussat

Arpattartut arfinillit Island Gamesimi nunarput sinnerlugu unammissapput. Arpannermi takissutsit pingasut peqataaffigineqassapput.

Nivi Geisler

Arpattartut nunanut allanut unammisartut sungiusaasuat, Uju Petersen aamma sungiusaasup ikiortaa Flemming Enequist, nunatsinni arpattartunik misileraatitsereerlutik, Island Gamesimi arpaqataasussat arfinillit maanna nassaaraat.

Island Games Guernseyimi julimi ukioq manna ingerlanneqalerpat, arnat marluk angutillu sisamat arpannermi unammisussat piareerput.

- Arpattartut pimoorussillutik aallussinissaat anguniarlugu arpannermik misilitsittarput,
misilitsinnermilu angusarineqartut naapertorlugit peqataasussat pitsaasut toqqaarneqarlutik., sungiusaasoq Uju Petersen oqarpoq.

Arpattartut peqataasussat toqqannginnerni arpannermi angusaat arpannermiillu ullorsiutaat misissorneqartarsimapput, pitsaanerpaamik angusaqartut peqataatissinnaajumallugit.

Uku peqataassapput:

  • Nivi Geisler, Nuuk
  • Rikke Rysgaard, Ilulissat
  • Rene Anda Nielsen, København (Nuuk)
  • Michael Clasen, Nuuk
  • Inuk Møller, Århus (Nuuk)
  • Hans Brummerstedt, København (Nuuk)

Isorartussutsit pingasut

Island Games Guernseyimi 8.-14. juli ingerlanneqalerpat nunatsinniit unammisussat peqataasussallu allat katillugit 74-it aallassapput. Timersuutit arfineq-marluk peqataaffiussapput.

Uju Petersen ilisimatitsivoq arpattarfimmi 5 aamma 10 kilometerisut isorartutigisut arpaffiussasut, kiisalu halvmaratonimut peqataasoqassasoq.

Island Gamesimi peqataasussat sinneri GIF-imiit sapaatip akunnerata tulliani saqqummiunneqassapput.

Powered by Labrador CMS