Isikkammik arsaanneq: B-67 pissartanngorluni ajugaarujussuartoq
Nuummeersut B-67 Qeqertarsuarmiunut G-44-mut ajugaarujussuarput nunatsinnilu pissartanngorlutik. K-33 bronzennapput.
B-67 nunatsinni pissartanngorput Qeqertarsuarmeersut G-44 marlunngornermi 15. august pissartanngorniutivinnermi ajugaaffigigamikkit.
Arsaannermi unamminerup affaani siullermi B-67-ip unammineq tiguarpaa, minutsillu 30-t qaangiussimaneranniilli pingasoriarlutik isertitsillutik. G-44 pissartanngorniunnermi pointitigut siuttuusimasoq unamminermik tiguaanngitsoorput.
G-44 unamminerup aappaani sukataarluaraluartoq, taamaattoq B-67 marloriarluni isertitseqqippoq. Unamminerlu B-67-imut 5-0-imik inerneqartoq dommerip naammassisutut nalunaarutigaa.
Najukkami klubbi bronzennattoq
Nunatsinni pissartanngorniunnermik aaqqissuisut, K-33 Nuummeersunut IT-79-imut unammigamik unammisut nalingiilluinnarpoq.
Unamminerup aallartissimalernerani IT-79 isertitsivoq siuarlunilu. Najukkamili klubbi tunniutiinnanngilaq, arsaannerullu affaata aappaa aallartissimatsiaannartoq isertitsipput, unammisut nalingiitsilerlugit. Periarfissat arlallit iluatsinngereerlugit K-33 isertitseqqippoq 2-1-imik siuarluni, isiginnaartut nuannatserujussuarlugit.
Ukioq manna unammilluarnerpaatut toqqarneqarpoq B-67-imeersoq Ari Heilmann. Niels Erik Eriksen G-44-meersoq ukioq manna teknikeritut toqqangaavoq. B-67-imeersoq Nicolai Nielsen qulingiluanik isertitsisimasoq, ukioq manna unamminerni isertitaqarnerpaatut taaneqarpoq.
B-67-imeersut ajugaallutik nuannattut uani takusinnaavatit:
