arsaanneq

Isikkammik arsaanneq annertusiniarlugu suleqatigiinnermut isumaqatigiissut

Kalaallit Nunaanni Arsaattartut Kattuffiat aamma Dansk Boldspil-Union nunatsinni isikkammik arsaanneq siuarsarniarlugu isumaqatigiipput. Kalaallit Nunaat Fifamut aamma Uefamut ilaasortanngornissaat pingaarnertut siunertarineqarpoq

Kalaallit Nunaat isikkammik arsaannerup tungaatigut nukittunerulissaaq.

Aamma nunarput siunissami ungasinnerusumi nunat assigiinngitsut isikkammik arsartartut kattuffissuannut soorlu Fifamut aamma Uefamut ilaasortanngussaaq. Tamanna Dansk Boldspil-Union suleqatigalugu pissaaq.

Kalaallit Nunaanni Arsaattartut Kattuffiat, ullumi marlunngornermi Dansk Boldspil-Unionilu suleqatigiinnermut isumaqatigiissummik atsiortussat taama oqariartuuteqarput.

Siuariartortoqassaaq
Kalaallit Nunaanni isikkammik arsaanneq siuarsarneqassaaq, kattuffiit siullermik kissaatigaat arsartunik, dommerinik aamma piumassutsimik ikiuukkusuttunik annertuumik siuariartitsinissartik.

Angunniakkat annertunerusut nassatarissavaat ivigaasanik arsaaffiit amerlanerusut, nunatsinni ukioq naallugu arsaaffiusinnaasut. Isumaqatigiissutip aamma nunatsinni peqqissutsip atukkallu isiginiarnerulersissavai.

- Kalaallit Nunaanni isikkammik arsarneq siuarsarniarutsigu pitsaasumik avatangiisinik pilersitsinissaq pisariaqarpoq. Meeqqat inuusuttuaqqallu arsarnissaannut periarfissinnissaat pisariaqarpoq. Taammaammallu ivigaasanik arsaaffinnik angisuunik Kalaallit Nunaanni sinerissami sisamanik arfinilinnilluunniit pilersitsinissarput sulissutigaarput, toqqavimmi pitsaanerujussuarmi isikkammik arsaassinnaaniassannata. Massakkummi taamaatsillugu periarfissaanngilaq, DBU-mi siulittaasoq, Jesper Møller oqarpoq.

Ikioqatigiinnissaq atorfissaqartikkaat
Naak DBU-p aamma GBU-p isumaqatigiissuteqarnerat nunatsinni isikkammik arsarnermik siuarsaataasussaagaluartoq, iliuuseqaqataasoqarnissaa pisariaqartoq GBU-mi siulittaasoq, John Thorsen oqarpoq.

- Inuiaqatigiinni, inuussutissarsiornermi aamma nunatsinni kattuffinni tamani ikioqatigiinneq nukittooq pilersinneqarnisaa pisariaqarpoq. Suliaq kisimiilluni kivikkuminaappoq, taamaammat avataanit ikiorneqassaagut.

Kisianni isikkammik arsaanneq soqutiginarsarnissaanut isumaqatigiissut, Kalaallit Nunaata Europami isikkammik arsaannermi akuulersinnaaneranut aallarniutaalluartoq siulittaasup oqaatigaa.

Isumaqatigiissut marlunngornermi ualikkut Nuummi atsiorneqassaaq.

Powered by Labrador CMS