Isikkammik arsaalluni pissartanngorniunnerit taamaatinneqarput
Katersuussinnaanermut killiliinerit Namminersorlutik Oqartussanit augustip aallaqqaataata tungaanut sivitsorneqareersullu, KAK aalajangerpoq nunatsinni isikkammik arsaalluni silami pissartanngorniunnerit taamaatiinnarneqassasut.
Kalaallit Nunaanni timersornikkut pisartut annerit ilaat coronavirus pissutigalugu taamaatiinnarneqartunut ilannguppoq.
Kalaallit Arsaattartut Kattuffiat marlunngornermi unnukkut nalunaaruteqarpoq isikkamik arsaalluni 2020-mi pissartanngorniunnerit taamaatiinnarneqartut. Tamanna pivoq Namminersorlutik Oqartussat katersuunnissamut killiliinerit augustip aallaqqaataanut sivitsuereernerani.
Nalunaarummi, juunip 16-anit augustip aallaqqaataat ilanngullugu atuuttumi, aaqqissuussani inuit amerlanerpaamik 250-it katersuussinnaalerput.
Nunalli iluani sumiiffinnit assigiinngitsunit tikerarneqartuni aaqqissuussani maleruagassat allaanerupput:
- Illup iluani silamilu aaqqissuussanik, nalliuttorsiornernik, sammisaqartitsinernik assigisaanilluunniit ingerlataqarniarnerni nalinginnaasumik aaqqissuussanut, nalliuttorsiornernut, sammisaqartitsinernut assigisaanulluunniit peqataaniartut sumiiffinniit assigiinngitsunit angalasariaqassagunik amerlanerpaamik katillugit 30-usinnaapput, nalunaarusiami paragraf 3-mi allassimavoq.
- Silami isikkamik-arsaalluni pissartanngorniunnissat taamaatiinnarneqarput, KAK Klubforum facebookimini taama nalunaaruteqarpoq.
- Namminersorlutik Oqartussat taama nalunaaruteqareersullu nalunaarutigissavarput aasamut pissartanngorniunnissaraluit ingerlanneqarnissaat naatsorsuutigineqarsinnaajunnaarallartut.
Peqqussutit allanngorsinnaanerat sivitsorneqarsinnaaneralluunniit ilimasaarutigineqarmat kattuffimmit nalilersuinerit ingerlattuarumaarpagut, massakkulli taama isikkoqartillugu pissartanngorniunnerit ingerlanneqarsinnaanngillat, KAK-imit nalunaarutigineqarpoq.